Endilikda tovarlar rasmiylashtiruvi jarayonida bojxona organlarining “Xavflarni boshqarish” axborot tizimi ranglarga ajratilgan yoʻlaklar orqali tovar, transport vositalari va shaxslarning xavf darajalari hamda ularga nisbatan qoʻllaniladigan bojxona nazorati shaklini belgilaydi.

Bunda “yashil yoʻlak” xavf darajasi past boʻlgan tovarlar boʻlib, avtomatik rasmiylashtiriladi. “Sariq yoʻlak” xavf darajasi oʻrta, bojxona nazoratining ayrim shakllari qoʻllaniladi (lekin bojxona va shaxsiy koʻrik bundan mustasno), “qizil yoʻlak” xavf darajasi yuqori, bojxona nazoratining bir yoki bir nechta shakllari majburiy amalga oshiriladi, “koʻk yoʻlak” bojxona nazorati esa tovarlar va transport vositalari chiqarib yuborilgandan soʻng ishlaydi.

2025-yil 1-oktyabrdan boshlab tovarlarni olib kirish, olib chiqish va tranzit qilish uchun barcha sertifikat va ruxsatnomalar faqat “Yagona darcha” bojxona axborot tizimi orqali rasmiylashtiriladi.

2026-yil 1-sentyabrdan esa bojxona qoʻmitasi logistika xizmatlarini oʻz ichiga olgan maxsus axborot platformasini ishga tushiradi. Bundan tashqari, chegara oʻtkazish punktlari yaqinida yangi bojxona terminallari qurilishi rejalashtirilgan.

Bundan tashqari, bir xil tovarlar uchun bitta tashqi savdo shartnomasi doirasida fitosanitar va ekologik sertifikatlar, karantin ruxsatnomalari, veterinar ruxsatnomalar hamda muvofiqlik sertifikatlari 1-yil muddatga bir marta taqdim etiladi.