Mamlakatimizdagi vazirliklar, idoralar va yuqori turuvchi tashkilotlarning markaziy apparati xodimlari oʻrtasida sogʻlom turmush tarzini keng targʻib qilish, ommaviy sportni rivojlantirish maqsadida futbol boʻyicha anʼanaviy “Bosh vazir kubogi — 2021” musobaqasi boʻlib oʻtadi. 

Oʻyinlar joriy yilning 5-noyabridan 10-noyabriga qadar “Bunyodkor” futbol akademiyasiga qarashli maydonlarda tashkil etiladi.

Hal qiluvchi final oʻyini esa 10-noyabr kuni soat 15.00 da mamlakatimizning bosh arenasi — “Bunyodkor” stadionida boshlanadi. Ayni vaqtgacha musobaqada qatnashish istagini bildirgan jamoalarning soni 30 tadan oshdi. 

Ertaga, 4-noyabr kuni soat 11:00 da Turizm va sport vazirligi (sobiq Jismoniy tarbiya va sport vazirligi) binosida "Bosh vazir kubogi — 2021» anʼanaviy futbol musobaqasiga qurʼa tashlash marosimi oʻtkaziladi.

Musobaqa Nizomiga koʻra, oʻyinlar 25 daqiqadan ikki boʻlim davom etadi. Har bir jamoa oʻz tarkibiga 15 nafar futbolchini kiritishi mumkin va almashishlar soni cheklanmagan.

Maʼlumot oʻrnida, 2019 va 2020-yillarda oʻtkazilgan “Bosh vazir kubogi” musobaqalarida bosh sovrin Oʻzbekiston Respublikasi Oliy sudi jamoasiga nasib etgan.