Ijtimoiy tarmoqlarda “Real Sanjik” taxallusi bilan tanilgan bloger Sanjar Karimov qamoqqa olindi. Bu haqda Oliy sud matbuot kotibi Aziz Abidov xabar berdi.

Bildirilishicha, Jinoyat ishlari boʻyicha Mirobod tuman sudida Toshkent shahar prokurori birinchi oʻrinbosarining Jinoyat kodeksining 112-moddasi 1-qismi va 25,273-moddasi 2-qismida nazarda tutilgan jinoyatlarni sodir etganlikda ayblanuvchi va Jinoyat-protsessual kodeksining 227-moddasi tartibida ushlangan S.K.ga nisbatan “qamoqqa olish” tarzidagi ehtiyot chorasini qoʻllash toʻgʻrisidagi iltimosnomasi taqdim etilgan hujjatlar bilan koʻrib chiqilgan.

Sudning 2025-yil 28-noyabrdagi ajrimi bilan Toshkent shahar prokurori birinchi oʻrinbosarining iltimosnomasi qanoatlantirilib, ayblanuvchi S.K.ga nisbatan qamoqqa olish tarzidagi ehtiyot chorasi qoʻllanilib, qamoqqa olinishi va tergov hibsxonasiga joylashtirilishi belgilangan.

Maʼlumot uchun, ijtimoiy tarmoqlarda “Real Sanjik” taxallusi ostida tanilgan bloger 1990-yilda Namangan viloyatida tugʻilgan, u “Finans invest” KSB taʼsischisi hisoblanadi.