“Taʼlim sohasidagi islohotlarni jadallashtirish boʻyicha qoʻshimcha chora-tadbirlar toʻgʻrisida”gi Prezident qarori (PQ-54-son, 02.02.2024 y.) qabul qilindi.

Qarorga koʻra, “Taʼlim sohasidagi loyihalar markazi” loyiha ofisi tashkil etiladi.

Loyiha ofisi 2024-yilda quyidagilarni amalga oshiradi, jumladan:

— pedagog kadrlarni tayyorlash, qayta tayyorlash va ularning malakasini oshirish tizimini tahlil qilish;

— professional taʼlimdan soʻng oliy taʼlimni davom ettirish imkoniyatlarini yanada kengaytirish, 3-yillik taʼlim dasturlari asosida amaliy bakalavriat boʻyicha kadrlar tayyorlashni yoʻlga qoʻyish;

— taʼlim sohasida xususiy sektor ulushini yanada oshirish uchun zarur shart-sharoitlar yaratish.

2024-yil 1-sentyabrgacha oʻquvchilar (talabalar)ning egallagan bilimini va pedagoglarning malakalarini baholash tizimi xalqaro tajribalar asosida takomillashtiriladi.

2024–2025-yillarda:

— Professional taʼlim yoʻnalishlari, mutaxassisliklari va kasblari klassifikatori – Xizmatchilarning asosiy lavozimlari va ishchilar kasblari klassifikatoriga, taʼlim dasturlari esa – yangilangan kasbiy standartlar va malaka talablariga moslashtiriladi;

— kamida 14 ta professional taʼlim muassasalarining faoliyatiga tajriba-sinov tariqasida xalqaro taʼlim dasturlari, kamida 10 ta oliy taʼlim muassasasi faoliyatiga – zamonaviy boshqaruv usullari va taʼlim sifatining yuqori standartlari joriy qilinadi;

— pedagogika, qishloq va suv xoʻjaligi, texnika, axborot texnologiyalari hamda iqtisodiyot sohasiga oid taʼlim yoʻnalishlarining xalqaro akkreditatsiyadan oʻtkazilishi taʼminlanadi.