Illyustrativ foto

Shvetsiya va Avstraliya olimlari tibolon preparatini menopauza sindromi (reproduktiv funksiyalarning pasayishi fonida menopauza davridagi yoshga bogʻliq oʻzgarishlar bilan bogʻliq holda yuzaga keladigan nevropsik, vegetativ-qon tomir, endokrin va boshqa kasalliklar bilan tavsiflangan holat)ni davolashda qoʻllash insult va miokard infarkti xavfini deyarli ikki baravar oshirishini aniqladi. Tadqiqot natijalari “British Medical Journal”ida chop etildi.

2007-yildan 2020-yilgacha oʻtkazilgan tadqiqot 50-58 yoshdagi 919 614 ayolni oʻz ichiga oldi. Ular kuzatuvdan oldin ikki yil davomida gormonal dorilarni qabul qilishmagan.

Ishtirokchilar qoʻllanilgan gormon terapiyasi turiga qarab sakkizta guruhga boʻlingan. Bir necha yillar davomida olimlar subyektlar orasida yurak tomirlari kasalligi, miokard infarkti, insult va venoz tromboemboliya holatlari haqida maʼlumot toʻplab borishdi.

Tadqiqot davrida 24 089 ta yurak-qon tomir hodisalari qayd etilgan boʻlib, ulardan eng koʻp koronar yurak kasalligi 43, venoz tromboemboliya esa 38 foiz holatda qayd etilgan.

Natijalar gormon terapiyasining turli shakllari turli darajadagi xavf bilan bogʻliqligini koʻrsatdi. Ogʻiz orqali estrogen-progestin terapiyasi venoz tromboemboliya ehtimolini 61-100 foizga va koroner yurak kasalligini 21foizga oshirdi. Eng katta xavf yurak xuruji va insult xavfini ikki baravar oshiradigan tibolon preparatini qoʻllash bilan bogʻliq edi. Shu bilan birga, gormonlarning transdermal shakllari (teriga qoʻllaniladigan) ogʻiz orqali yuboriladigan vositalarga nisbatan kamroq salbiy taʼsir koʻrsatdi.

Ushbu natijalar menopauza davrida terapiyani tayinlashda gormonal dorilarni qabul qilish yoʻli va tarkibini hisobga olish muhimligini koʻrsatmoqda. Shu bois tadqiqotchilar, ayniqsa, yurak-qon tomir kasalliklariga moyil boʻlgan ayollar uchun davolash usulini tanlashga ehtiyotkorlik bilan yondashishni tavsiya qilishmoqda.