Foto: Global Look Press

AQSH, Ukraina va Yevropa mamlakatlari Moskva va Kiyev tomonidan tuziladigan kelajakdagi har qanday tinchlik shartnomasini qoʻllab-quvvatlash rejasini kelishib olgan. Bu haqda “The Financial Times” gazetasi oʻz manbalariga tayanib xabar berdi.

Nashrning yozishicha, Vashington va Yevropa mamlakatlari Rossiya tomoni shartnomani “doimiy ravishda buzsa”, “muvofiqlashtirilgan harbiy javob” berishga kelishib olgan. Dastlab, javob diplomatik ogohlantirish va Ukraina Qurolli Kuchlari tomonidan choralar koʻrilishini oʻz ichiga oladi. Bu harakatlar kelishuv buzilganidan keyin 24 soat ichida amalga oshiriladi.

Agar harbiy harakatlar davom etsa, vaziyatga “koʻngillilar koalitsiyasi” aralashadi. Toʻliq koʻlamli hujumga oʻtish kollektiv Gʻarb tomonidan qoʻllab-quvvatlanadigan kuchlarning faollashishiga olib keladi. Shuningdek, AQSH qoʻshinlarini jalb qilish ham rejalashtirilgan. Gʻarb kuchlari birinchi sulh buzilishidan 72 soat oʻtgach harakatni boshlaydi.

Shu yilning 2-fevral kuni Rossiya prezidenti matbuot kotibi Dmitriy Peskov Moskva va Kiyev Ukraina muzokaralari jarayonidagi bir qator masalalar boʻyicha hali ham kelishuvga erisha olmaganini aytdi. Biroq, Kreml vakili tomonlar boshqa baʼzi masalalar boʻyicha umumiy tushunchaga yaqinlashganini taʼkidladi.