Foto: Associated Press

Vashington Ukrainadagi mojaroga barham berish va tinchlikni taʼminlash rejasining asosiy elementi uning suvereniteti va hududiy yaxlitligini saqlash boʻlishi kerak, deb hisoblaydi. Bu haqda AQSH davlat kotibi Entoni Blinken maʼlum qildi.

Shu oʻrinda u bunday tamoyilga ustuvor ahamiyat qaratmaydigan strategiyani “vaqtni behuda sarflash taktikasi” deb atadi.

“Bu konstruktiv diplomatiya emas. Rossiya qoʻshinlarini Ukraina hududidan olib chiqib ketishni oʻz ichiga olmaydigan oʻt ochishni toʻxtatish haqidagi chaqiriq, mohiyatan Rossiya yutuqlarini «ratifikatsiya qilish”ni qoʻllab-quvvatlaydi», - deya qoʻshimcha qildi Amerika diplomatiyasi rahbari.

Avvalroq, Blinken Qoʻshma Shtatlar Ukrainaga 350 million dollarlik yangi harbiy yordam paketini taqdim etishini aytgan edi.

U “HIMARS” uchun yangi oʻq-dorilar, gaubitsalar va “Bradley” piyoda askarlar uchun jangovar mashinalari, “HARM” raketalari, tankka qarshi qurollar va daryo qayiqlarini oʻz ichiga oladi.