AQSH mudofaa vazirining maʼlum qilishicha, Amerika Qoʻshma Shtatlari harbiylari Yamanning Husiylar guruhi nazorati ostidagi hududlarida bir qator nishonlarni bombardimon qildi. Mudofaa vaziri Lloyd Ostinning aytishicha, zarbalar guruhning beqarorlashtiruvchi hatti-harakatlariga qaratilgan.

Vazirning qoʻshimcha qilishicha, AQSH Harbiy-havo kuchlarining B-2 yashirin bombardimonchi samolyotlari beshta yer osti qurol saqlash joyiga aniq zarbalar bergan. Qurol omborida Husiylar tomonidan mintaqadagi fuqarolik va harbiy kemalarni nishonga olish uchun ishlatiladigan qurol komponentlari saqlangan.

"Bu Qoʻshma Shtatlarning yer ostida qanchalik chuqur koʻmilgan yoki mustahkamlangan boʻlishidan qatʼi nazar, dushman obyektlarini nishonga olish qobiliyatining noyob namoyishi boʻldi”, degan Ostin.

Husiylarning “Al Masirah” telekanali Yaman poytaxti Sana va uning qalʼasi Saada atrofida havo hujumlari uyushtirilgani haqida xabar berdi. U vayronagarchilik va qurbonlar haqida hozircha maʼlumot bermagan.

Noyabr oyidan beri Husiylar Qizil dengiz, Adan koʻrfazi va Bob al-Mandeb boʻgʻozlarida Isroil bilan bogʻliq kemalarga koʻplab hujumlar uyushtirdi va ular buni Isroilning Gʻazoga qarshi urushi paytida falastinliklar bilan birdamlik kampaniyasi, deb taʼrifladilar. Ammo guruh urushga aniq aloqasi boʻlmagan tijorat kemalariga ham hujum qilgani aytiladi.

Isroil va “Hizbulloh” oʻrtasidagi ziddiyat kuchayib borar ekan, Husiylar Isroildan Livanga hujumini toʻxtatishni talab qilmoqda.
Oʻtgan oy Husiylar Isroilning Tel-Aviv va Ashkelon shaharlariga, shuningdek, AQSH harbiy-dengiz kuchlarining uchta harbiy kemasiga raketalar va uchuvchisiz samolyotlar bilan hujum qilganliklarini daʼvo qilishdi.

B-2 Spirit Husiylarga qarshi hujumlarda oldin ishlatilgani haqida hech qanday maʼlumot yoʻq. Yadroviy quvvatga ega B-2 birinchi marta 1999-yilda Kosovo urushida ishlatilgan va shundan beri Afgʻoniston, Iroq va Liviyaga joylashtirildi. U AQSH harbiylari tomonidan kamdan-kam hollarda qoʻllaniladi. Chunki har bir samolyot taxminan 1 milliard dollarga tushadi.

“Bloomberg” agentligi xabariga koʻra, B-2 samolyotlari AQSHning Missuri shtatidagi Uaytman havo kuchlari bazasidan nishonga uchgan. Har bir B-2 20 tonnagacha bomba, shu jumladan 80 ta 227 kgli GPS oʻq-dorilarini olib yurishga qodir.

Oxirgi portlashlar Birlashgan Millatlar Tashkilotining Yaman boʻyicha maxsus vakili Xans Grundbergning mamlakat Yaqin Sharqdagi harbiy kuchayish sari tortilishi xavfi borligi haqida ogohlantirganidan bir kun oʻtib sodir boʻldi. Grundberg BMT Xavfsizlik Kengashida yamanliklar tinchlikka intilayotgan bir paytda, mintaqada zoʻravonlik kuchayib borayotganining toʻxtashiga umid qilishlari uzoqqa choʻzilishi mumkinligini aytdi.