Foto: Bosh prokuratura huzuridagi Departament

Andijon shahrida alkogol va tamaki mahsulotlari savdosida qonunbuzarlik holatlari aniqlandi. Bosh prokuratura huzuridagi Departamentning Andijon shahri boʻlimi tomonidan oʻtkazilgan tezkor tadbirda “B.k.” xususiy korxonasi masʼul shaxslari litsenziya olmasdan, korxonaning oziq-ovqat doʻkoni orqali alkogol mahsulotlarini noqonuniy ravishda sotib kelgani fosh etildi.

Tadbir natijasida 537 dona turli nomdagi qalbaki aksiz markali alkogol mahsulotlari ashyoviy dalil sifatida olindi.

Shuningdek, Xonobod shahrida ham shunga oʻxshash huquqbuzarlik holati qayd etildi. Departamentning Xonobod shahri boʻlimi hamda Ichki ishlar boʻlimi xodimlari hamkorligida oʻtkazilgan tezkor tadbir davomida yakka tartibdagi tadbirkor Sh.O.ga tegishli savdo doʻkonidan 97 dona qalbaki aksiz markali alkogol mahsulotlari va 342 quti tamaki mahsuloti topildi va ashyoviy dalil sifatida musodara qilindi.

Ikkala holat yuzasidan Oʻzbekiston Respublikasi Jinoyat kodeksining tegishli moddalari asosida jinoyat ishlari qoʻzgʻatildi. Hozirda ushbu ishlar boʻyicha tergov harakatlari olib borilmoqda.

Mazkur holatlar alkogol mahsulotlarining nazoratsiz aylanishi va soliqdan qochish holatlariga qarshi kurashda masʼul idoralar tomonidan olib borilayotgan faol harakatlarning bir qismidir.