Andijon viloyatida kuchli taʼsir qiluvchi dori vositalari savdosi bilan shugʻullanib kelgan shaxslar ushlandi, deb xabar bermoqda Iqtisodiy jinoyatlarga qarshi kurashish departamenti.

Bildirilishicha, Bosh prokuratura huzuridagi Departamentning Andijon shahri boʻlimi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan.

Aniqlanishicha, kuchli taʼsir qiluvchi dori vositalari savdosi bilan shugʻullanib kelgan 4 nafar fuqaro 6 dona “Regapen” nomli dori vositasini fuqaroga 480 ming soʻmga sotgan vaqtida qoʻlga olingan.

Shundan soʻng, tezkor tadbir davom ettirilib, fuqarolar Sh.B. va N.D.ning avtotransport vositalari koʻzdan kechirilib, sotish maqsadida olib kelingan 310 dona “Tropikamed” va “Regapen” nomli kuchli taʼsir qiluvchi dori vositalari ashyoviy dalil sifatida rasmiylashtirib olingan.

Hozirda mazkur holat yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qoʻzgʻatilib, tergov harakatlari oʻtkazilmoqda.