Videodan kadr

Andijon viloyati Andijon tumanida piyodalar oʻtish joyidan yoʻlni kesib oʻtayotgan ikki piyodani “Nexia-3” urib yubordi. Viloyat Yoʻl harakati xavfsizligi xizmati hodisa yuzasidan maʼlumot berdi.

Bildirilishicha, voqea bugun, 12-oktyabr kuni soat 14:30 larda Andijon tumani “Qurama” MFY hududidan oʻtgan A-373 Xalqaro ahamiyatga ega avtomobil yoʻlining 343 kilometrida sodir boʻlgan.

Maʼlum boʻlishicha, 1969-yilda tugʻilgan haydovchi S.R. oʻzining “Nexia-3” rusumli transport vositasini “Bogʻishamol — Jalaquduq” yoʻnalishi boʻylab boshqarib ketayotib, tartibga solinmagan piyodalar oʻtish joyidan yoʻlni kesib oʻtayotgan voyaga yetmagan piyodalar N.Y va N.I.ni urib yuborgan.

YTH oqibatida, 1 nafar voyaga yetmagan piyoda N.I. “Chap oyogʻining yopiq sinishi” jarohati bilan RShTTYoIM Andijon filialiga yotkizilgan. Viloyat YHXBning “Xalq soʻzi”ga maʼlum qilishicha, N.Y voqea joyidan ketib qolgan. Aniqlanishicha, u hech qanday tan jarohati olmagan.

Mazkur holat yuzasidan hozirda Andijon tumani IIB Tergov boʻlimi xodimi tomonidan dastlabki tergovga harakatlari olib borilmoqda.