Qozogʻistonning Aqtau shahrida Xalqaro turkiy madaniyat tashkiloti — TURKSOY Doimiy kengashining 42-yigʻilishi boʻlib oʻtdi.

​

Mazkur yigʻilishda TURKSOY tomonidan joriy yilda amalga oshirilgan ishlar tahlil qilinib, 2026-yilda oʻtkaziladigan tadbirlar rejasi, qoʻshma loyihalar va turkiy dunyoning madaniy sohadagi hamkorligini yanada mustahkamlashga oid masalalar muhokama qilindi.

​

​

Yigʻilishda Oʻzbekiston Respublikasi madaniyat vaziri Ozodbek Nazarbekov, Qozogʻiston Respublikasi madaniyat va axborot vaziri Aida Balayeva, Turkmaniston madaniyat vaziri Atageldi Shamiradov, Ozarbayjon Respublikasi madaniyat vaziri oʻrinbosari Murad Guseynov, Qirgʻiz Respublikasi madaniyat, axborot va yoshlar siyosati vazirining birinchi oʻrinbosari Askarali Madaminov, Turkiya Respublikasi madaniyat va turizm vazirining oʻrinbosari Serdar Cham, TURKSOY Bosh kotibi Sulton Rayev ishtirok etdi.

​

​

Shuningdek, joriy yilda Turkiy davlatlar tashkilotining Gabala shahrida boʻlib oʻtgan sammiti doirasida qabul qilingan “TURKSOY tashkilotini rivojlantirish va mustahkamlash togʻrisida”gi qaror ijrosini taʼminlash dolzarbligi taʼkidlandi.

​

Oʻzbekiston Respublikasi madaniyat vaziri Ozodbek Nazarbekov bu juda muhim hujjat ekanini alohida qayd etib, uning ijrosi TURKSOYning xalqaro tashkilot sifatidagi maqomi va mavqeyini yuksaltirishga xizmat qilishini bildirdi. Shu bilan birga, qator taklif va tashabbuslarni ilgari surdi.

Maʼlumki, TURKSOY Doimiy kengashi qarori bilan har yili turkiy tilli davlatlardagi shaharlardan biri “Turkiy dunyoning madaniyat poytaxti” sifatida eʼlon qilinadi. Bunday maqomga ega boʻlgan shaharda va hamkor davlatlarda qator madaniy tadbirlar, festivallar, ilmiy anjumanlar, uchrashuvlar tashkil etiladi. Bu orqali milliy madaniyat xalqaro miqyosda keng targʻib qilinib, sayyohlar oqimini oshirishga ham xizmat qiladi.

​

Quvonarlisi shundaki, TURKSOY Doimiy kengashining 42-yigʻilishida “Andijon shahri — 2026-yilda turkiy dunyoning madaniyat poytaxti” deb eʼlon qilindi. “Aqtau — 2025-yilda turkiy dunyoning madaniyat poytaxti” tadbirlarining tantanali yopilish marosimida Andijon shahri hokimligiga maxsus sertifikat topshiriladi.

​

Doimiy kengash yigʻilishi yakunida kun tartibida koʻrib chiqilgan masalalar yuzasidan qaror qabul qilinib, tegishli hujjatlar imzolandi. Eslatib oʻtamiz, 2020-yilda Xiva shahri turkiy dunyoning madaniyat poytaxti sifatida tanlangan edi.

​