Bugun Samarqand shahridagi Alisher Navoiy nomidagi markaziy istirohat bogʻi ertalabdan davlat va jamoat tashkilotlari vakillari, professor-oʻqituvchilar, yozuvchi va shoirlar, talaba-yoshlar hamda oʻquvchilar bilan gavjum boʻldi.

Bogʻ markazida oʻrnatilgan Hazrat Alisher Navoiy haykali poyida buyuk mutafakkir tavalludining 585 yilligi munosabati bilan tantanali tadbir oʻtkazildi. Unda Navoiy hayoti va faoliyati, uning boy adabiy-maʼnaviy merosi, shuningdek, bugungi kunda yoshlar tarbiyasida tutgan beqiyos oʻrni haqida atroflicha fikr-mulohazalar bildirildi.

Tadbir davomida Alisher Navoiy asarlari dunyo xalqlarining bebaho maʼnaviy merosiga aylangani, ushbu qutlugʻ sana nafaqat mamlakatimizda, balki jahonning koʻplab davlatlarida ham keng nishonlanayotgani taʼkidlandi. Hazrat Navoiyning gʻazal va ruboiylaridan namunalar oʻqilib, sheʼriyat ixlosmandlariga yuksak maʼnaviy zavq ulashdi.

Tadbir yakunida ishtirokchilar Alisher Navoiy haykali poyiga gulchambarlar qoʻyib, ulugʻ mutafakkir xotirasiga ehtirom izhor etdilar.

Qayd etilishicha, ushbu sana munosabati bilan viloyatdagi taʼlim muassasalari, tashkilot va idoralarda ham Navoiy ijodiga bagʻishlangan adabiy-maʼrifiy tadbirlar, Navoiyxonlik kechalari oʻtkazilmoqda.

Abdulaziz YOʻLDOSHEV, “Xalq soʻzi”.