Oliy Majlis Qonunchilik palatasi yalpi majlisda “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun loyihasi deputatlar tomonidan birinchi oʻqishda koʻrib chiqilmoqda.

Qayd etilganidek, qonun loyihasi bilan Oʻzbekistonning kapital bozorida emissiya qilingan qimmatli qogʻozlar savdo natijalari boʻyicha amalga oshiriladigan hisob-kitoblar (qimmatli qogʻozlarda va pul mablagʻlarida) bitta tashkilot doirasida amalga oshiriladi, investorlar uchun sharoitlar yaratiladi.

Shuningdek, xorijiy markaziy depozitariylar va xalqaro hisob-kitob depozitariylari bilan Oʻzbekistonning kapital bozori ishtirokchilarining hisob-kitob operatsiyalari boʻyicha toʻgʻridan-toʻgʻri aloqasi oʻrnatiladi.

Bundan tashqari, loyiha bilan aksiyadorlik jamiyatlari tomonidan toʻlanadigan dividendlarni qimmatli qogʻozlarning markaziy depozitariysi orqali oʻtkazish amaliyoti joriy qilinadi, aksiyadorlarning qonuniy huquq va manfaatlari himoya qilinadi, kapital bozorida emissiya qilingan qimmatli qogʻozlar savdo natijalari boʻyicha amalga oshiriladigan hisob-kitob operatsiyalari xatari minimallashtiriladi.