Foto: Oliy Majlis Senati axborot xizmati

Senatorlar kun tartibidagi yana bir masala – “Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartish va qoʻshimchalar kiritish haqida”gi Qonunni muhokama qildi. Bu haqda Oliy Majlis Senatining Axborot xizmati xabar berdi.

Mudofaa va xavfsizlik masalalari qoʻmitasi raisi K. Burxonov qayd etganidek, Qonun amaliyotda uchrayotgan muammoli holatlarni keltirib chiqarayotgan qonunchilikdagi nomuvofiqliklarni bartaraf etish maqsadida ishlab chiqilgan.

Qonun bilan Maʼmuriy javobgarlik toʻgʻrisidagi kodeksning 227²¹ va 227²³-moddalariga tegishli oʻzgartirishlar kiritilib, chegara qoʻshinlariga ushbu moddalarda nazarda tutilgan huquqbuzarliklarni sodir etgan shaxslarni, huquqbuzarlik transport vositalaridan foydalanib sodir etilganida mazkur transport vositalarini ushlab turish vakolati berilmoqda.

Shuningdek, Maʼmuriy javobgarlik toʻgʻrisidagi kodeksning 224 va 224¹-moddalarida nazarda tutilgan huquqbuzarliklarni (chegara zonasiga, shuningdek, fuqarolarning kirishi va boʻlishiga vaqtincha cheklov belgilangan joylarga kirish, ularda yashash qoidalarini buzish hamda davlat chegarasi orqali oʻtkazish punktlaridagi rejimni buzish) koʻrib chiqish vakolati chegara qoʻshinlariga berilmoqda.

Qonunning qabul qilinishi fuqarolar ortiqcha vaqt sarflashining oldini olinishiga xizmat qilishi taʼkidlandi.

Qonun senatorlar tomonidan maʼqullandi.