Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz ishtiroklarini davom ettirmoqda.

Boks boʻyicha Oʻzbekiston terma jamoasi aʼzosi Abdumalik Xalokov (-57 kg) oltin medal uchun Qirgʻiz Respublikasi vakili Munarbek Saidbek oʻgʻliga qarshi ringga koʻtarildi.

Qiziqarli kechgan bahsning birinchi raundida hamyurtimiz 5:0 hisobida raqibini yutdi. Ikkinchi raund ham xuddi hisobda bokschimiz foydasiga hal boʻldi. Shu tariqa butun jang davomida ustunlik qilgan Abdumalik Olimpiada oʻyinlarining oltin medalini qoʻlga kiritdi.

Parij Olimpiadasida oʻz ishtirokini 1/8 final bosqichida boshlagan Abdumalik Xalokov bu bosqichda Shvetsiya vakili Nebil Ibragim 5:0 hisobida yengdi. Chorak finalda esa Ispaniya vakili Xose Kilesga ham hech qanday imkoniyat qoldirmadi — 5:0. Shu tariqa yarim finalga yoʻlga hamyurtimiz bu safar avstraliyalik Charli Seniorga ham hech qanday imkoniyat qoldirmadi.

Maʼlumot uchun aytish mumkinki, Abdumalik Xalokov Anvar oʻgʻli 2000-yil 9-aprelda Buxoroda tugʻilgan. Abdumalik 2023-yilda jahon chempioni boʻlgan boʻlsa, 2021-yilda kumush medalini qoʻlga kiritgandi. Shuningdek, u 2022-yilda Osiyo oʻyinlari va Osiyo chempioni boʻlgan.

Avvalroq, “Tokio-2020” gʻolibi Akbar Joʻrayev “Parij-2024”da kumush medaliga ega chiqqandi.