Foto: Istanbuldagi Bosh konsulxona

Firibgarlik jinoyatini sodir etganlikda ayblanib, 5 yildan buyon qidiruvda boʻlgan oʻzbekistonlik shaxs Turkiyada qoʻlga olindi. Bu haqda Istanbuldagi Bosh konsulxona xabar berdi.

Qayd etilishicha, 1977-yilda tugʻilgan Otabek Mashrabovich Abdullayev firibgarlik jinoyatini sodir etganlikda ayblanib 2019-yilda qidiruvga berilgan. U Turkiya va Oʻzbekiston Ichki ishlar vazirliklari hamkorligida oʻtkazilgan tezkor tadbir davomida qoʻlga olingan.

Ushbu shaxs bugun, 12-sentyabr kuni Bosh konsulxona xodimlari ishtirokida Oʻzbekistonga deportatsiya qilingan.

“Uning xatti-harakatlaridan jabr koʻrgan fuqarolardan Oʻzbekiston Respublikasining Istanbul shahridagi Bosh konsulxonasiga yoki Oʻzbekiston Respublikasi Ichki ishlar vazirligi yoxud uning quyi tizimlariga murojaat qilish soʻraladi”, deyiladi xabarda.

Shuningdek, konsulxona xabarida jinoiy javobgarlikdan qochib xorijiy davlatlarda, shu jumladan Turkiyada yashirinib yurgan har bir shaxsga nisbatan jinoiy taʼqib izchil ravishda davom ettirilishi va jinoyat uchun javobgarlik prinsipi qatʼiy taʼminlanishi taʼkidlangan.