Joriy yilning 4-aprel kuni Fargʻona viloyati, Fargʻona tumanining Chimyon shaharchasidagi 2- sonli bolalar-oʻsmirlar sport maktabida Bel olish va uch kurash boʻyicha 2006-2007-yillarda tugʻilgan oʻgʻil bolalar va qizlar oʻrtasida Oʻzbekiston chempionati boshlandi.

Oʻzbekiston Respublikasi Jismoniy tarbiya va sport vazirligi hamda Oʻzbekiston Bel olish va uch kurash assotsiatsiyasining yillik taqvim-rejasidan joy olgan mazkur mamlakat chempionatida ishtirok etish uchun Qoraqalpogʻiston Respublikasi, Toshkent shahri va barcha viloyatlardan 400 nafardan ortiq yosh polvonlar ishtirok etishmoqda.

4-aprel kuni shuningdek, musobaqaning tantanali ochilish marosimi ham tashkil etildi. Marosimda soʻz olgan Fargʻona tumani hokimi oʻrinbosari Ilhom Toshpoʻlatov, Bel olish va uch kurash assotsiatsiyasi bosh kotibi Nosir Azizovlar barcha sportchilarga tiladi. Tadbir doirasida Fargʻona tuman hokimligiga Bel olish va uch kurash assotsiatsiyasi tomonidan tashakkurnoma va esdalik sovgʻalari topshirilgan boʻlsa, Bel olish va uch kurash boʻyicha Fargʻona viloyat hududiy assotsiatsiyasi tomonidan ham 2-3-aprel kunlari oʻquv-seminarda ishtirok etgan hakamlar va murabbiylar uchun esdalik sovgʻalari ulashildi.

Reglamentga muvofiq, Bel olish va uch kurashning yaktakli yoʻnalishi boʻyicha bellashuvlar 6-aprelga qadar davom etadi. 7-apreldan esa uch kurash boʻyicha musobaqaga start beriladi.