2024-yil davomida Oʻzbekistondagi 949 ta yirik soliq toʻlovchi jami 123,3 trillion soʻm soliq toʻlagan. Ushbu koʻrsatkich mamlakat iqtisodiyotining turli sektorlarida yirik korxonalar tomonidan soliqqa oid majburiyatlarning yuqori darajada bajarilganini koʻrsatadi. Bu haqda “Fiskal tahlillar” portali xabar berdi.

Jami soliq tushumlarining asosiy qismi davlat ulushi mavjud korxonalarga toʻgʻri kelgan. TOP-10 davlat ulushi mavjud korxonalar tomonidan 70,2 trillion soʻm soliq toʻlangan. Bu koʻrsatkichda “Navoiy kon-metallurgiya kombinati” AJ yetakchi boʻlib, 35,4 trillion soʻm soliq toʻlagan. Shuningdek, “Olmaliq kon-metallurgiya kombinati” AJ 10,7 trillion soʻm, “Navoiyuran” DK 4,6 trillion soʻm, va “Oʻzbekneftgaz” AJ 4,1 trillion soʻm soliq tushumlari bilan roʻyxatdan joy olgan.

Xususiy sektor ham iqtisodiyotda muhim oʻrin egallab, 8,6 trillion soʻmdan ortiq soliq tushumini taʼminladi. Xususiy sektordagi eng yirik soliq toʻlovchi sifatida “UZBAT” AJ QK 2,9 trillion soʻm bilan yetakchilik qilmoqda. Shuningdek, “Tashkent Tobacco” MCHJ 1 trillion soʻm, “GID License Plate” MCHJ XK 845,9 milliard soʻm, va “Enter Engineering LTD” MCHJ 844,4 milliard soʻm soliq toʻlagan.

2024-yilning yirik soliq toʻlovchilarining umumiy tushumlariga TOP-20 korxona tomonidan 64 foiz ulush qoʻshilgan. Bu davlat ulushi mavjud va xususiy sektordagi korxonalarning iqtisodiyotdagi faol ishtirokini yaqqol koʻrsatadi.

Yirik soliq toʻlovchilar tomonidan taʼminlangan mazkur soliq tushumlari mamlakat byudjeti barqarorligi va iqtisodiyotning barqaror rivojlanishi uchun muhim ahamiyat kasb etadi. Davlat ulushi mavjud korxonalar yetakchilik qilishda davom etayotgan boʻlsa-da, xususiy sektorning faol ishtiroki va soliq majburiyatlarini bajarishdagi masʼuliyati ham ortib bormoqda.