Gʻayrat Otajonov/“Xalq soʻzi”. Davlatimiz rahbarining Qoraqalpogʻistonga qaratayotgan alohida eʼtibori va gʻamxoʻrligi hududga investitsiyalarni jalb qilish uchun qulay sharoitlar yaratish, tadbirkorlikni rivojlantirishda ham muhim dasturilamal boʻlayotir.

Oʻzbekiston Respublikasi Prezidentining 2023-yil 8-avgustda qabul qilingan “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi Farmoni asosida 2023-2024-yillarda Qoraqalpogʻiston Respublikasining Nukus shahrida 1 million AQSH dollari, qolgan tumanlarida 300 ming AQSH dollari miqdorida investitsiya kiritish majburiyati bilan loyiha tashabbuskorlariga, shu jumladan, chet el investitsiyalari ishtirokidagi korxonalarga Qoraqalpogʻiston Respublikasi Vazirlar Kengashi qarori asosida yer uchastkalarini toʻgʻridan-toʻgʻri, uzoq muddatli ijara huquqi bilan berish tizimi joriy qilindi.

Shunga muvofiq, “LONG WATER” masʼuliyati cheklangan jamiyati rahbari, tadbirkor Qayrat Balaxanovga Nukus shahridan investitsiya kiritish sharti bilan auksionsiz, uzoq muddatga ijara asosida 30 sotix yer maydoni ajratildi.

— Hududda toza ichimlik suviga boʻlgan ehtiyoj yuqoriligini hisobga olib, sifatli ichimlik suv ishlab chiqarish va uni maxsus idishlarda qadoqlashni yoʻlga qoʻymoqchimiz, — deydi deydi “LONG WATER” MCHJ direktorining oʻrinbosari Temur Umbetov. — Korxonaning qurilish ishlari aprel oyida boshlangan. Loyihani amalga oshirish uchun 14 milliard soʻm miqdorida investitsiya kiritishni rejalashtirganmiz. Korxona ishga qoʻshilgach 30 ta yangi ish oʻrni yaratiladi.

Ishlab chiqarish uchun zarur boʻlgan barcha texnika va asbob-uskunalar Xitoy davlatidan olib kelinadi. Albatta, ular zamonaviy va xalqaro talablar darajasidagi uskunalar boʻladi.

Korxona quriladigan maydon boʻyicha yer osti suvi oʻrganildi. Negaki, ishlab chiqariladigan suv yer ostidan olinadi va yetti bosqichli tozalashdan oʻtkaziladi. Dastlab gazsiz rangli va rangsiz suvlarni ishlab chiqarishni yoʻlga qoʻysak, keyin xalqimizning ehtiyojidan kelib chiqib gazli suvlarni ham ishlab chiqarish rejalashtirilgan.

Prezidentimizning farmoni asosida yaratilgan imtiyozlarni qoraqalpogʻistonlik tadbirkorlar uchun obrazli aytganda, “imkoniyatlar sari ochilgan yangi yoʻl” deyish mumkin.

Qoʻngʻirot tumani “Almazar” mahallasida “ULUGBEK KIYET“ masʼuliyati cheklangan jamiyati tomonidan umumiy qiymati 300 ming AQSH dollarini tashkil qiladigan loyiha boshlangan. Mazkur loyiha doirasida zamonaviy avtomobillarga xizmat koʻrsatish markazi qurilmoqda. Markaz ishga tushgach, hududdagi 15 nafar aholining doimiy bandligi taʼminlanadi.

Shuningdek, “Azatliq” mahallasida “REGAL BEREKET TEAM“ MCHJ tomonidan umumiy qiymati 870,0 ming AQSH dollari boʻlgan loyiha boʻyicha savdo va koʻngilochar markazining qurilish ishlari amalga oshirilmoqda. Ushbu loyihada esa, 12 ta yangi ish oʻrni yaratiladi.

— Kasbim agronom boʻlgani uchun bundan 4-yil oldin qishloq xoʻjaligi ekinlarini zararkunanda va kasalliklardan himoyalovchi vositalari savdosini yoʻlga qoʻygandik, — deydi Xoʻjayli tumanidagi “JAYXUN OʻSIMLIKLERI” MCHJ direktori Baxitjan Allambergenov. — Keyingi paytlarda tadbirkorligimizni kengaytirish, xususan, baliqchilik, parrandachilik bilan shugʻullanishni reja qilib yurardim. Prezidentimizning farmoniga muvofiq, investitsiya kiritish majburiyati bilan auksionsiz yer maydoni ajratib berildi. Albatta, berilgan bu imkoniyatdan samarali foydalanish maqsadida baliq boqish uchun sunʼiy koʻlni qazdik, parrandachilikka moʻljallangan qurilmalarni qurayapmiz. Loyihamiz ishga tushgach, ish oʻrinlar soni 20 ga yetkaziladi.

Xoʻjayli tumanidagi “STOMA SMILE“ oilaviy korxonasiga ham 1,3 sotix yer maydonni auksionsiz, investitsiya kiritish majburiyati bilan ajratib berildi.

Korxona rahbari Mavluda Abdullayevaning aytishicha, hozirgi kunda xususiy stomatologiya klinikasida 6 nafar xodim ishlayapti. Kelgusida uni yangi zamonaviy tibbiy-asbob uskunalar bilan jihozlab, aholiga xizmat koʻrsatish sifatini yaxshilagan holda koʻlamini ham kengaytirish rejalashtirilgan.

Tegishli imtiyoz asosida ajratilgan yer maydonida esa 4 milliard soʻm miqdorida investitsiya kiritilib, 25 ta yangi ish oʻrnini yaratish belgilangan. Yangi klinikaga Germaniya va Italiyadan zamonaviy tibbiy asbob-uskunalar olib kelinishi moʻljallangan.

Eʼtiborlisi, berilgan imtiyoz va imkoniyatlar natijasida Qoraqalpogʻistonda oldin boʻlmagan yangi yoʻnalishlarda ishlab chiqarish korxonalari bunyod etilmoqda. Nukus shahrida isitish radiatorlari va lift qurilmalari ishlab chiqarilishi yoʻlga qoʻyilayotgani bunga yaqqol misoldir.

Shavkat Obidxoʻjayev rahbarligidagi “OSTEN TECHNOLOGIES” masʼuliyati cheklangan jamiyatiga Nukus shahridan 8,6 gektar yer maydoni ajratildi va iyul oyida qurilish ishlari boshlab yuborildi. Bunyod etilayotgan ushbu korxonada isitish radiatorlari va lift qurilmalari ishlab chiqariladi, 1000 ta yangi ish oʻrinlari yaratiladi.

Bugungi kungacha 100 nafardan ortiq tadbirkorlarga auksionsiz, investitsiya kiritish sharti bilan toʻgʻridan-toʻgʻri yer maydonlari ajratilgan. Investitsiya loyihalari amalga oshirilgach, bu tadbirkorlik subyektlarida minglab yangi ish oʻrinlari yaratilishi shubhasizdir.