Ijtimoiy tarmoqlarda Yozvon tumanining Boʻtqachi qishlogʻida yashagan navqiron yoshdagi Abdulazizni Katta Fargʻona kanaliga choʻkib ketgani bilan bogʻliq xabarlar keng tarqalmoqda. “Xalq soʻzi” muxbiri qidirilayotgan bolaning otasi bilan suhbatlashdi.

Maʼlum boʻlishicha, 2020-yilning 22-dekabr kuni ikki tanishi hamrohligida boʻlgan voyaga yetmagan Abdulaziz ismli yigit baʼzi sabablarga koʻra, kiyimlarini yechib Katta Fargʻona kanaliga tushgan va choʻkib ketgan. Viloyat favqulodda vaziyatlar, IIB boshqarmasi va boshqa huquqni muhofaza qiluvchi idoralar qutqaruv guruhi tomonidan bir necha kunlik qutqaruv ishlari hozircha natija bermayapti.

“Rossiyada ishlab kelayotgan edim. Shirin diydor umidi alam va iztirobga aylandi. Huquqni muhofaza qiluvchi idoralarga rahmat. Havo qattiq sovuq boʻlishiga qaramay, bolamni tunu kun izlashyapti. Oʻgʻlimning jonsiz tanasini boʻlsa ham bir bagʻrimga bosish umidida qayiqda oʻzim ham qidiruv ishlarida qatnashyapman”, dedi uning otasi Abduhoshim aka.

Fargʻona viloyati IIB axborot xizmati rahbari Ismoil Sharipovning maʼlum qilishicha, ayni kunlarda Katta Fargʻona kanalining 10 ta tuman hududidan oʻtgan 150 kilometr qismida qidiruv-qutqaruv ishlari davom etmoqda. Bu holat yuzasidan voyaga yetmagan shaxsning bedarak yoʻqolganligi boʻyicha qidiruv eʼlon qilingan.
 

B. Madiyorov,
“Xalq soʻzi”