Bu Vazirlar Mahkamasining shu yil 13-dekabrdagi “Toshkent hayvonot bogʻini kelgusida modernizatsiya qilish chora-tadbirlari toʻgʻrisida”gi qarorida belgilab qoʻyildi.

Unga koʻra, Oʻzbekiston Respublikasi Madaniyat vazirligi va Davlat aktivlarini boshqarish agentligining “Toshkent hayvonot bogʻi” davlat muassasasi tashkiliy-huquqiy shaklini masʼuliyati cheklangan jamiyat shaklidagi xoʻjalik jamiyatiga aylantirgan holda, “Wildlife Care” MCHJga ishonchli boshqarishga berish toʻgʻrisidagi taklifiga rozilik berildi.

Qarorda belgilab qoʻyilganidek:

a) “Toshkent hayvonot bogʻi” masʼuliyati cheklangan jamiyatining ustav kapitali qayta tashkil etilayotgan “Toshkent hayvonot bogʻi” davlat muassasasi mol-mulklarining qoldiq balans qiymatida shakllantiriladi va jamiyatning ustav kapitalidagi taʼsischi funksiyasi Davlat aktivlarini boshqarish agentligi tomonidan amalga oshiriladi;

b) Ishonchli boshqaruvchi tomonidan Ishonchli boshqarish shartnomasi talablariga toʻliq rioya etilgan taqdirda, shartnomaning muddati 30 yilgacha uzaytirib boriladi;

v) “Toshkent hayvonot bogʻi” masʼuliyati cheklangan jamiyatiga aylantirilganda “Toshkent hayvonot bogʻi” davlat muassasasining amaldagi soliq rejimi saqlanib qolinadi;

g) ishonchli boshqaruvchi uchun toʻlanadigan haq miqdori “Toshkent hayvonot bogʻi” masʼuliyati cheklangan jamiyatining yil yakunlari boʻyicha hisoblanadigan divident hisobidan toʻlanadi;

d) ishonchli boshqaruvchi tomonidan jalb qilingan investitsiyalar auditorlik tashkilotining hisobotiga asosan “Toshkent hayvonot bogʻi” masʼuliyati cheklangan jamiyatining sof foydasidan qaytariladi;

ye) “Toshkent hayvonot bogʻi” masʼuliyati cheklangan jamiyatiga “Toshkent hayvonot bogʻi” davlat muassasasi uchun 2019-yilda ajratilgan mablagʻlardan kam boʻlmagan miqdorda byudjet hisobidan mablagʻlar ajratilib boriladi.

Qayd etilishicha, “Toshkent hayvonot bogʻi” davlat muassasasining tashkiliy-huquqiy shakli masʼuliyati cheklangan jamiyat shaklidagi xoʻjalik jamiyatiga aylantiriladi

Ishonchli boshqaruvchi tomonidan bildirilgan quyidagi takliflar esa maʼlumot uchun qabul qilingan:

dastlabki besh yil davomida 5 mln. AQSH dollari miqdorida investitsiya kiritish;

hayvonlar tarkibiy turini koʻpaytirish;

yangi volyerlarni qurish va mavjudlarini rekonstruksiya qilish;

hayvonlar uchun reabilitatsiya markazini tashkil etish va hayvonot bogʻi ishchilarining malakasini oshirish uchun oʻquv markazini tashkil etish;

zamonaviy audio-video vizualizatsiyasini joriy etish va boshqalar.

Bunday islohot bejizga emas. Sababi, maʼlumotlarga koʻra, bugungi kunda hayvonot bogʻi uchun davlat kompaniyasi masʼuli boʻlib, bu nafaqat dunyo standartlariga javob bermaydi, balki u zarar koʻrayotgan tashkilot hamdir(oxirgi yillarda unga davlat byudjetidan 22,7 mlrd. soʻm ajratilgan).

Binobarin, qaror bilan hayvonot bogʻini rivojlantirish konsepsiyasi ham tasdiqlandi. Natijada u hozirgi zarar koʻrayotgan muassasadan dunyo andozalariga mos keladigan(onlayn-chiptalar, merchendayzing, mobil ilovalar, hayvonlarni saqlash uchun sharoitlarni yaxshilash, ularni parvarishlashning yangi darajasi va hokazo) va foyda koʻradigan korxonaga aylanadi.

Konsepsiya uchta bosqichga boʻlingan:

2020-2021-yillar. Hayvonot bogʻi holatini har tomonlama tahlil qilish, rekonstruksiya uchun ustuvor obyektlarni aniqlash

2021-2022-yillar. Hayvonot bogʻini bosqichma-bosqich rekonstruksiya qilish, uning jozibadorligini oshirish.

2022-2024-yillar. Barcha rejalashtirilgan qurilish va boshqa ishlarni yakunlash.

2024-2029-yillar. Infratuzilmani yangilash, sharoitlarni yaxshilash, zaruratga qarab hayvonot bogʻini hududini kengaytirish.