Foto: Bosh prokuratura huzuridagi Departament

Bosh prokuratura huzuridagi Departament Qashqadaryo viloyatida imtiyozli narxlarda tarqatilishi lozim boʻlgan koʻmirni sotayotgan shaxslarni fosh qildi. Bu haqda Departamentning matbuot xizmati xabar berdi.

Qayd etilishicha, Bosh prokuratura huzuridagi Departamentning Qashqadaryo viloyati boshqarmasi tomonidan oʻtkazilgan tezkor tadbirda qonunbuzarlik holati aniqlangan.

Maʼlum boʻlishicha, fuqaro R.K. “Koʻmir taʼminot” MCHJning Qarshi shahri koʻmir ombori masʼul shaxslari bilan oʻzaro til biriktirib, kuz-qish mavsumida imtiyozli narxlarda aholiga tarqatilishi lozim boʻlgan 70 tonna koʻmirni fuqaro R.X.ga 4 000 AQSH dollariga sotishga kelishib olgan.

Shundan soʻng, dastlab 4 tonna koʻmirni ombordan olib chiqib kelgan vaqtida ashyoviy dalillar bilan Departament xodimlari tomonidan qoʻlga tushirilgan.

Shuningdek, tergovga qadar tekshiruv jarayonida ushbu koʻmir ombori masʼul shaxslari umumiy bahosi 388,8 million soʻmlik jami 451,4 tonna imtiyozli koʻmirni qimmat narxlarda sotib yuborganliklari aniqlangan. Aholiga koʻmirni imtiyozli narxda tarqatishi kerak boʻlgan masʼullar tamagirlik qilib, ushbu holatda qonunni buzganliklari oshkor boʻldi.

“Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishi qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq, Nodirbek Abdusattorov yana Magnus Karlsenga qarshi dona surishi maʼlum boʻlgandi.