Oʻzbekistonda 2024-yil 1-noyabr holatiga koʻra faoliyat yuritayotgan yuridik shaxslar soni 566 ming 818 tani tashkil etmoqda. Ushbu tashkilotlardan 70 ming 978 tasi joriy yilning yanvar-oktabr oylarida roʻyxatdan oʻtgan. Yangi tashkilotlarning roʻyxatdan oʻtishi iqtisodiyotning turli sohalarida oʻsish surʼatlarini koʻrsatmoqda.

“Fiskal tahlillar” portaliga koʻra, yuridik shaxslar orasida savdo sohasi eng yuqori koʻrsatkichga ega boʻlib, unda 147 ming 723 ta tashkilot faoliyat yuritmoqda. Qishloq, oʻrmon va baliq xoʻjaligi esa 140 ming 928 ta tashkilot bilan ikkinchi oʻrinda turadi. Sanoat sektori ham salmoqli boʻlib, 66 ming 801 ta yuridik shaxs bilan uchinchi oʻrinni egallagan.

Yashash va ovqatlanish boʻyicha xizmatlar ham oʻsish surʼati boʻyicha yuqori koʻrsatkichga ega sohalardan biridir. Ushbu xizmatlar sektorida jami 28 ming 708 ta tashkilot faoliyat yuritmoqda. Qurilish sohasi esa 32 489 ta yuridik shaxs bilan yetakchi sohalardan biri sifatida ajralib turadi.

Hududiy jihatdan eng koʻp yuridik shaxs Toshkent shahrida roʻyxatdan oʻtgan boʻlib, bu yerda 102 ming 686 ta tashkilot faoliyat yuritmoqda. Samarqand viloyati esa 54 ming 103 ta yuridik shaxs bilan Toshkent shahridan keyin ikkinchi oʻrinda turadi. Fargʻona viloyati ham 50 ming 064 ta tashkilot bilan yuqori oʻrinlarni egallab turibdi.

Qayd etish kerakki, bank operatsiyalarini amalga oshirmagan va soliq hisobotlarini taqdim etmagan tijorat tashkilotlari avtomatik ravishda nofaol holatga oʻtkaziladi. Ushbu holat biznes muhitini tozalash va faoliyat yuritayotgan tashkilotlarning haqiqiy sonini aniqlashda muhim.

Avvalroq, Oʻzbekiston Rossiya yoki Xitoyning qaysi biri bilan kattaroq savdo aylanmasiga egaligi haqida xabar berilgandi.