Foto: Illustrativ

Davlat xavfsizlik xizmatining Xorazm viloyati boʻyicha boshqarmasi va boshqa tegishli huquqni muhofaza qiluvchi idoralar bilan hamkorlikda oʻtkazilgan tezkor tadbirda noqonuniy dori vositalari bilan shugʻullanib kelgan shaxs qoʻyga olindi. Bu haqda DXX axborot xizmati xabar berdi.

Maʼlum boʻlishicha, Urganch shahrida istiqomat qiluvchi fuqaro (1983-yilda tugʻilgan) oʻzining yashash xonadonida 64 ming 452 dona dori vositalarini kelgusida sotish maqsadida saqlab kelayotganligi aniqlandi.

Baholash faoliyati bilan shugʻullanuvchi MCHJ xulosasiga koʻra, mazkur dori vositalarining umumiy qiymati 2 milliard 908 million 608 ming soʻmni tashkil qiladi.

Sogʻliqni saqlash vazirligining “Farmatsevtika mahsulotlari xavfsizligi markazi” DM ekspertiza tekshiruvi xulosasiga koʻra, ushbu dori vositalarining ayrim turlariga nisbatan muvofiqlik sertifikatlari rasmiylashtirilmaganligi, ayrimlari esa sifatsiz va yaroqsiz holatda ekanligi maʼlum boʻldi.

“Hozirda holat yuzasidan mazkur shaxsga nisbatan Jinoyat Kodeksining 186-3 — moddasi 3-qismi «a” bandi bilan jinoyat ishi qoʻzgʻatilib, tergov harakatlari olib borilmoqda», deyiladi xabarda.