Украина президенти Владимир Зеленский жума куни Дональд Трамп билан учрашувда Россияга зарба бериш учун «Tomahawk» ракеталарини ололмади.

Зеленский Вашингтонга узоқ масофага учувчи қанотли ракеталарни олиш умидида борган эди, унинг фикрича, бу ракета Россия ичидаги нефть ва энергетика объектларига мақсадли зарбалар бера олади ва Кремлнинг уруш иқтисодиётини йўқ қилади.

Оқ уйдаги ишчи тушлик пайтида Трамп урушни «Tomahawk» ҳақида ўйламасдан ҳал қилишга умид билдирди ва бу қурол Американинг ўзига ҳам кераклигини қўшимча қилди. АҚШ президенти ҳар икки томонни жангларни айни вақтда ҳозирги чизиқларда тўхтатишга чақирди.

Шундай қилиб, Зеленский «қуруқ қўл» билан қайтди, аммо учрашувни самарали деб таърифлаган. АҚШ эскалацияни хоҳламагани учун Трамп «Tomahawk» ҳақида қўшимча изоҳ беришдан бош тортган.

«Иккала томон ҳам уйига қайтиши, оиласи олдига бориши, қотилликни тўхтатиши керак. Шундай бўлиши керак», — деган Оқ уй раҳбари учрашувдан сўнг Флоридага учиш жараёнида.

Учрашувдан бир кун олдин Трамп Путин билан телефон орқали гаплашиб, тез орада Венгрияда кўришишга келишиб олган эди. Айтилишича, Путин ушбу қўнғироқ чоғида Россиянинг Москва ва Санкт-Петербург каби йирик шаҳарларини нишонга олиш радиусига эга бўлган «Tomahawk» жанг майдонига жиддий таъсир кўрсатмаслигини таъкидлаган. Аммо уларнинг Украинага берилиши АҚШ ва Россия муносабатларига путур етказишини айтган.

Нима учун Украина «Tomahawk»ка интилмоқда?

«Tomahawk» ракеталари Украинанинг ҳозирги қурол-аслаҳа омборидаги бошқа ракеталарга қараганда анча узоқ масофага эга. Трамп уларни етказиб бериш бўйича музокараларни кучайтирган бўлсада , бу ҳақида аниқ бир фикр билдирмаган.

Оқ уйдаги жума кунги учрашув олдидан Зеленский Украина дронларини АҚШ «Tomahawk»ларига айирбошлашни таклиф қилган бўлиши мумкин.

«Украинада минглаб дронларни ишлаб чиқаряпмиз, лекин бизда «Tomahawk» йўқ. Улар минглаб дронларга эга бўлишлари мумкин, биз бу борада ишлашга тайёрмиз», — деган Зеленский.

Зеленский Трамп билан учрашувдан сўнг Европа етакчилари билан гаплашиб, уларга маълумот берган. Европалик иттифоқчилар Россиянинг давом этаётган тажовузидан Украинани ҳимоя қилишга содиқлигини билдирган.

Зеленский Трамп урушга ечим берадиган шахс деб билади ва Яқин Шарқдаги адолат Украина учун ҳам ишлашига умид билдирган.

Шунга қарамай Трамп жангларни тугатишда Украина ерларидан воз кечиши борасида турли позицияда қолмоқда. Август ойида Путин билан учрашуви олдидан у уруш тугаши учун ер алмашиш зарурлигини айтган, кейинчалик у Украина Россия томонидан босиб олинган барча ҳудудларни қайтариб олишига ишонишини билдирган эди. Трамп жума кунги чиқишида Путин бу сафар келишувга эришмоқчилигини айтган.