Кеча, 16 январь куни Саудия Арабистонида ташкил этилаётган U23 Осиё чемпионати мусобақасининг чорак финал ўйинлари давом эттирилди. Кун доирасидан ўрин олган дастлабки баҳсда Япония U23 терма жамоаси Иордания билан куч синашди.

Учрашув 1:1 ҳисобидаги дуранг натижа билан якунланди. Голларга японлардан Шусуке Фуруя, Иордания термасидан эса Али Ал-Азаиза муаллифлик қилди.

Пеналтидан сериясида эса омад “кунчиқар юрти“ вакилларига насиб қилди. Иордания термасидан дастлабки зарбани амалга оширган Муҳаммад Таҳа ва сўнгги зарбани амалга оширган Муҳаммад Ал-Шатти зарбада адашди. Якуний ҳисоб 4:2.

Иккинчи ярим финалда эса Вьетнам У-23 терма жамоаси Бирлашган Араб Амирликлари термаси билан беллашди. Ўйиннинг асосий вақти 2:2 ҳисобидаги дуранг натижаси билан якунланди.

Голларга Вьетнамдан Нгуен Ле Пат ва Нгуен Дин Бак, БАА термасидан эса Жуниор Ндиае ва Саиф Ал-Менҳали муаллифлик қилдилар.

Асосий вақт дуранг билан якунлангач, ғолиб қўшимча бўлимларда аниқланди. Биринчи экстра таймнинг 101-дақиқасида Пам Мин Пук ғалаба голини киритди. Шу тариқа Вьетнам У-23 терма жамоаси мусобақанинг ярим финалига йўл олди.

Маълумот учун, энди вьетнамликлар финал йўлида Ўзбекистон ва Хитой терма жамоалари ўртасидаги ўйин ғолиби билан беллашади.