Россия президенти Владимир Путин АҚШнинг Украинада вақтинчалик ўт очишни тўхтатиш таклифига рози бўлди, деб хабар бермоқда «NBC News» нашри.

Нашрнинг маълум қилишича, бугун, 13 март куни Россия раҳбари ҳамда Беларусь президенти Александр Лукашенко ўртасида қўшма матбуот анжумани ўтказилган. Унда Россия етакчиси «Россия-Украина ўртасида вақтинчалик ўт очишни тўхтатиш» тўғрисидаги таклифни қўллаб қувватлаши ҳақида сўз очган.

«Биз жанговар ҳаракатларни тўхтатиш бўйича таклифларга розимиз, бироқ ҳар қандай сулҳ узоқ муддатли тинчлик ва можарога сабаб бўлган омилларнинг бартараф этилишига олиб келиши лозим»,  —  деган Путин.

Шунингдек, Россия президенти битим кучга киргач Украина ҳарбий сафарбарлик ўтказмаслиги, қурол харид қилмаслиги ҳамда бу келишув узоқ муддатли тинчликка сабаб бўлиши учун кафолатлар хоҳлашини қўшимча қилди.

Бундан ташқари, Владимир Путин битим масаласини Америка раҳбари Дональд Трамп билан ҳам муҳокама қилиши кераклигини инкор этмаган.

«Вақтинчалик ўт очишни тўхтатиш ғоясини қўллаб-қувватлаймиз. Аммо муҳокама қилишимиз керак бўлган масалалар мавжуд. Бу борада Америка раҳбари билан музокаралар ўтказишимиз шарт. Узоқ йиллик бу можарони тинч йўл билан ҳал қилиш таклифи Россия томонидан тўлиқ қўллаб-қувватланади»,  —  деган Путин ўз нутқида.

Эслатиб ўтамиз, аввалроқ, АҚШ президенти Дональд Трамп Россия ҳамда Украина ўртасида тинчлик сулҳи тузиш бўйича Россия етакчиси Владимир Путин билан шу ҳафтанинг ўзидаёқ музокара ўтказиши мумкинлиги ҳақида гапирган эди.