Украина НАТО иттифоқчиларидан ўзининг биринчи «F-16» қирувчи самолётларини олди ва бу мамлакатнинг мудофаа қобилиятини сезиларли даражада оширганини кўрсатади. Бу ҳақда «France 24» нашри хабар берди.

Маълум бўлишича, президент Владимир Зеленский қирувчи самолётларни намойиш қилиб, уларнинг Украинанинг Россия билан давом этаётган можаросида аҳамиятини нақадар катта эканлигини билдирган. «F-16»ларни Бельгия, Дания, Нидерландия ва Норвегия каби давлатлар Украинага совға сифатида жўнатишган.

Зеленский бу самолётлар Украинанинг уруш бошланганидан бери муҳим эҳтиёж бўлган ҳаво мудофаа тизимини кучайтиришини билдирди. 50 йилдан бери хизмат қилган ва НАТО томонидан кенг қўлланилаётган «F-16» самолётлари энди Украина ҳарбий арсеналининг асосий қисмига айланади.

Қирувчи самолётларнинг намойишкорона парвозлари эҳтимолий Россия ҳужумларидан ҳимоя қилиш учун хавфсиз жойда ўтказилди. Зеленский, шунингдек, Киев Москванинг аэродромларга қилиши мумкин бўлган ҳужумларидан ҳимояланиш учун самолётларнинг бир қисмини хорижий ҳарбий базаларда сақлаши мумкинлигини ҳам тан олган.

Украина қўшни давлатлар билан ўз мудофаасини янада мустаҳкамлаш устида ишламоқда ва НАТО-Украина кенгаши ғоясини таклиф қилган. Ушбу кенгаш НАТО мамлакатларига Украинани ракета ҳужумларидан ҳимоя қилиш учун коалиция тузиш имкониятини муҳокама қилиш имконини беради.

Халқаро таҳлилчиларга кўра, Россия Украинада НАТО давлатларининг ҳарбий қирувчи самолётларидан фойдаланиш бошланса, Москва НАТО объектларини нишонга олиши мумкин. «F-16» қирувчи самолётларининг Киевга олиб келиниши мамлакатнинг ушбу курашдаги янги саҳифасининг очилганини англатади.

Аввалроқ, воситачилар Исроил ва ҲАМАСни ўт очишни тўхтатишга чақираётгани ҳақида хабар берилганди.