Бугун, 20 июль тонгида АҚШнинг Луизиана штатида жойлашган «Smoothie King Center» мажмуасида ММА бўйича UFC 318 турнири ўтказилди.

Мазкур турнирнинг марказий жангида енгил вазн тоифаси BMF камари соҳиби, Гавайи ороллари вакили Макс Ҳоллоуэй ҳамда ушбу вазннинг собиқ вақтинчалик чемпиони Дастин Порье тўқнаш келди.

Тўлиқ 5 раунд давом этган марказий жангда ҳакамларнинг бир овоздан қабул қилган қарори билан Макс Ҳоллоуэй ғалаба қозонди. Маълумот учун, ушбу жанг Ҳоллоуэй ҳамда Порье ўртасидаги учинчи, «трилогия» жанги бўлди. Бундан олдинги икки жангда Дастин Порьенинг қўли баланд келганди.

Ушбу жангдан сўнг, америкалик ММА устаси расмий равишда фаолиятини якунлашини эълон қилди. Таъкидлаш жоизки, кўплаб ММА мухлислари Дастин Порьени UFCдаги «Тожсиз қирол» деб аташади. Сабаби, Порье фаолияти давомида кўплаб юлдузли жангчилар билан тўқнаш келиб, уларни мағлуб қилишга муваффақ бўлган бўлсада, мутлақ чемпионлик камарига эга чиқмаган.

Дастин Порье 1989 йилнинг 19 январь санасида АҚШнинг Луизиана штатида туғилган. Америкалик профессионал аралаш яккакураш устаси . У енгил вазнда UFCнинг собиқ вақтинчалик чемпиони.

Порье 2009 йилда профессионал тарзда ММА турнирларида қатнашиб бошлаган. Ўша вақтда мағлубиятсиз, кетма-кет 7 марта ғалабага эришган. 2011 йилга келиб, UFC билан шартнома имзолаган. Дастин Порье профессионал ММА жангларидаги фаолияти давомида 40 та жанг ўтказиб, 30 тасида зафар қучган. 10 та жангда имкониятни бой берган.