Бош прокуратура ҳузуридаги Департаментнинг Олмазор тумани бўлими ва ИИББ ходимлари ҳамкорлигида тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган тезкор тадбир давомида валюта айирбошлаш билан шуғулланиб келган фуқаро Р.К. 4 минг 300 АҚШ долларини фуқаро А.А.га 52 миллион сўмга сотган вақтида ашёвий далиллар билан қўлга олинган.

Шу каби яна бир ҳолат, департаментнинг Мирзаобод тумани бўлими, ДХХ ва ИИБ ходимлари ҳамкорлигида ўтказилган тезкор тадбирда ҳам аниқланган.

Унга кўра, фуқаро И.Ж. фуқаро Ж.Р.га 4 минг АҚШ долларини 48,8 миллион сўмга сотган вақтида тезкор тадбир ходимлари томонидан ушланган.

Бундан ташқари, департаментнинг Косон тумани бўлими ва ИИБ ходимлари ҳамкорлигида ўтказилган тезкор тадбирда валюта айирбошлаш билан шуғулланиб келган М.Ш. фуқаро Б.Ё.дан 4 минг АҚШ долларини 47,6 миллион сўмга сотиб олган вақтида ушланиб, 4 минг 300 АҚШ доллари ва 65,7 миллион сўм ашёвий далил сифатида расмийлаштириб олинган.

Ҳозирда мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.