Bosh prokuratura huzuridagi Departamentning Olmazor tumani boʻlimi va IIBB xodimlari hamkorligida tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida valyuta ayirboshlash bilan shugʻullanib kelgan fuqaro R.K. 4 ming 300 AQSH dollarini fuqaro A.A.ga 52 million soʻmga sotgan vaqtida ashyoviy dalillar bilan qoʻlga olingan.

Shu kabi yana bir holat, departamentning Mirzaobod tumani boʻlimi, DXX va IIB xodimlari hamkorligida oʻtkazilgan tezkor tadbirda ham aniqlangan.

Unga koʻra, fuqaro I.J. fuqaro J.R.ga 4 ming AQSH dollarini 48,8 million soʻmga sotgan vaqtida tezkor tadbir xodimlari tomonidan ushlangan.

Bundan tashqari, departamentning Koson tumani boʻlimi va IIB xodimlari hamkorligida oʻtkazilgan tezkor tadbirda valyuta ayirboshlash bilan shugʻullanib kelgan M.Sh. fuqaro B.Yo.dan 4 ming AQSH dollarini 47,6 million soʻmga sotib olgan vaqtida ushlanib, 4 ming 300 AQSH dollari va 65,7 million soʻm ashyoviy dalil sifatida rasmiylashtirib olingan.

Hozirda mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki oʻtkazish) bilan jinoyat ishlari qoʻzgʻatilib, tergov harakatlari oʻtkazilmoqda.