Кучли таъсир қилувчи дори воситалари савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги Департаментнинг Тошкент шаҳри бошқармаси ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Унда қонунга хилоф равишда дори воситалари савдоси билан шуғулланиб келган Д.Х. фуқарога 63 дона «Регапен» номли хорижда ишлаб чиқарилган кучли таъсир қилувчи дори воситасини 500 АҚШ долларига сотган вақтда ушланган ва ундан жами 83 дона дори воситаси ашёвий далил сифатида расмийлаштириб олинган.

Шу каби яна бир ҳолат, Департаментнинг Зангиота туман бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда ҳам аниқланган.

Унга кўра, фуқаро Ш.Ю. фуқарога 5 дона «Зардекс» номли кучли таъсир қилувчи дори воситасини 1,2 млн сўмга сотган вақтида ашёвий далиллар билан қўлга олинган.

Шунингдек, Департаментнинг Марҳамат тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда қонунга хилоф равишда дори воситалари савдоси билан шуғулланиб келган Д.У. 3 дона «Тропикамид» номли кучли таъсир қилувчи дори воситасини фуқаро А.А.га 700 минг сўмга сотган вақтида ушланган.

Шундан сўнг, тезкор тадбир давом эттирилиб, фуқаро Д.У.га дори етказиб берувчи шахс М.У. 27 дона капсуладаги «Регапен« номли кучли таъсир қилувчи дори воситасини сотиш мақсадида олиб келган вақтида ашёвий далиллар билан фош қилинган.

Ҳозирда мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.