АҚШ президенти Дональд Трампнинг Буюк Британияга қилган давлат ташрифи Қўшма Штатлар ва Лондон ўртасидаги муносабатлар узилмас эканини яна бир бор кўрсатди.

Бироқ ташриф Буюк Британия бош вазири Кир Стармер учун осон бўлмади. Чунки Трамп келиши арафасида у Питер Манделсонни Вашингтондаги элчи лавозимидан озод этган эди. Сабаб сифатида Манделсоннинг вояга етмаганларнинг жинсий савдосида айбланган Жеффри Эпштейн билан алоқалари тилга олинди. Трамп ўз навбатида Эпштейн билан 2000 йилларда алоқалар узилганини ва 2019 йилда қамоқда вафот этгунга қадар у билан йиллар давомида гаплашмаганини айтди.

Фаоллар Трамп келиши олдидан Виндзор қасри ёнида унинг Эпштейн билан суратларини чиқаришди, аммо кейинчалик ҳибсга олинди. Президент ташриф давомида норозилик намойишлари ва саволлардан иложи борича узоқда сақланди. Ҳатто матбуот анжуманида журналистлар Стармерга Эпштейн ҳақида фақат битта савол бериш билан чекланди. Ҳукумат Трампни шу тариқа кутди, зиёфат берди ва ҳеч қандай катта инқирозсиз кузатиб қўйди. Аммо Британия ушбу ташрифдан қандай фойда кўрди?

Инвестициялар ва технологиялар

Стармер эълон қилган энг йирик натижа — “Tech Prosperity Deal”. Бу келишувга кўра, АҚШ компаниялари Британияга 150 миллиард фунт стерлинг сармоя йўналтиради. Шу жумладан, 31 миллиард фунтдан ортиқ маблағ сунъий интеллект ва технологик инфратузилмани ривожлантиришга сарфланади. Кейинги 10 йил ичида эса асосий сармоя — 90 миллиард фунт “Blackstone” хусусий капитал фирмаси орқали киритилади.

Ҳукумат бу сармоя туфайли 7600 га яқин иш ўрни яратилишини айтмоқда. Аммо мутахассислар сармояларнинг катта қисми аввалдан режалаштирилган бўлганини, фақат Трамп ташрифи билан боғлаб эълон қилинганини қайд этмоқда.

Британиянинг собиқ вице-премьери, кейинчалик Metaʼда юқори лавозимда ишлаган Ник Клегг мамлакат АҚШ технологиясига тобелик кучайиб бораётганини танқид қилди.

“Nvidia” бош директори Женсен Хуангнинг фикрича, СИ инфратузилмаси Британиядан энергия таъминотини кучайтиришни талаб қилади. Трамп эса Британиянинг маҳаллий нефть ва газ қазиб чиқаришни тўхтатиш режаларини доим танқид қилиб келган, бу эса кейинчалик СИ маълумот марказларини қувват билан таъминлашга ёрдам бериши мумкин.

Атом энергетикаси ва савдо

Икки давлат атом энергетикасида ҳамкорликка келишди. АҚШ ва Британияда атом электр станциялари қурилишини енгиллаштириш бўйича битим имзоланди. Бироқ бу битимнинг иқтисодий самаралари узоқ муддатда кўринади.

Савдода эса Британия АҚШ билан бождан кейинги келишувга эришган биринчи давлат сифатида фахрланиши мумкин. Трамп Британия товарларига 10 фоизлик тариф жорий қилди, бу Европа Иттифоқига нисбатан қўйилганидан пастроқ. Аммо 10% ҳали ҳам катта рақам ҳисобланади.

Лондон Трамп ташрифи олдидан АҚШга пўлат экспорти учун қўлланилаётган 25 фоизлик тариф бекор қилинишига умид қилган эди, аммо бу масалада ўзгариш бўлмади.

Ташқи сиёсат

Стармер ташқи сиёсатда ҳам тортишувларни юмшатишга муваффақ бўлди. Трамп Британиянинг Фаластин давлатини тан олиш режасига қарши эканини айтди, бироқ Стармерни очиқ танқид ҳам қилмади.