Эндиликда Тошкент давлат шарқшунослик институти қошидаги Конфуций институти фаолиятини пойтахтдаги политехника касб-ҳунар коллежи биносида давом эттиради.

Ҳозирча унинг аудиториялари 850 квадрат метр майдонни эгаллаган. Коллежга қабул қилиш тўхтатилди. Иккинчи ва учинчи босқич ўқувчилари таҳсилни тугатгач, бундан уч баравар катта корпус институт ихтиёрига берилади.

Рамзий кўчиб ўтиш маросимида қатнашган ХХРнинг Ўзбекистондаги Фавқулодда ва мухтор элчиси Цзян Яннинг изоҳлашича, институт майдонининг кенгайтирилишига сабаб хитой тилини ўрганишга қизиқувчилар сони ортган. Ҳозирда Тошкент ва Самарқандда фаолият кўрсатаётган Конфуций институтларида дунёдаги энг мураккаб тиллардан бирини икки мингга яқин ўзбекистонликлар ўрганмоқда. Ўз навбатида, Чин ўлкасининг тўртта олий ўқув юртида ўзбек тили йўналишлари очилган. Элчининг сўзларига кўра, бу халқларимиз бир-бирини янада яхшироқ танишга интилаётгани, маданий-гуманитар алоқалар мазмунан бойиб бораётганидан далолатдир.

— Ушбу ўқув йилида 780 кишини қабул қилдик, ҳолбуки талаб икки баравар кўп эди, — дейди институтнинг Ўзбекистон томонидан директори Саодат Носирова. — Машғулотлар уч сменада олиб борилади. Ўқитувчиларимиз орасида хитойликлар билан бирга, ХХРда малака оширган маҳаллий педагоглар ҳам бор. Қайд этиш жоизки, Хитойда тажриба ошириб келиш педагогларимиз учун мажбурий талаб, деб белгиланган.

Хитой тили, асосан, инглиз тили билан чекланиб қолишни истамаётган билимга чанқоқ ёшларда катта қизиқиш уйғотмоқда. Бироқ илмга интилиш ёш танламайди: Конфуций институтида таҳсил олаётган энг кичик ўқувчи 8 ёшга тўлган бўлса, 65 ёшида бу қадимги тилни ўрганишга киришганлар ҳам бор.
Р. АЛИШЕРОВ.

Суратлар муаллифи: Ҳасан Пайдоев/"Халқ сўзи".