Видеодан кадр

Тошкент шаҳрининг Сергели туманида 3 та, Чилонзор туманида эса 2 та машина иштирокида йўл-транспорт ҳодисаси содир бўлди. Бу ҳақда пойтахт ИИББ ЙҲХБ ахборот хизмати хабар берди.

Маълум қилинишича, бугун, 25 май куни соат 00:15 ларда Сергели туманидаги Қипчоқ кўприги устида катта тезликда ҳаракатланган «Lacetti» руль бошқарувини йўқотиб, қарама-қарши йўналишга чиқиб кетган. Шундан сўнг ўз йўналишда келаётган «Tracker-2» ҳамда «Matiz» русумли транспорт воситалари билан тўқнашган.

Мазкур ЙТҲ оқибатида «Lacetti» ҳайдовчиси, «Matiz» ҳайдовчи ва йўловчига биринчи ёрдам кўрсатилган.

Шу куннинг ўзида, соат 01:00 ларда Чилонзор тумани Бунёдкор шоҳ кўчасида 24 ёшли М.Т. «Nexia-3» русумли транспорт воситасида руль бошқарувини йўқотиб, ёритгичлар устунига бориб урилган. Тўқнашув оқибатида машина қарама-қарши йўналишга ўтиб кетган ҳамда 28 ёшли А.А. бошқарувидаги «Lacetti» билан тўқнашиб йўл-транспорт ҳодисаси содир этган.

Ушбу ҳодиса туфайли ҳар иккала транспорт воситаси ҳайдовчиси ҳамда «Nexia-3» йўловчисига биринчи ёрдам кўрсатилган.

Ҳозирда мазкур ҳолатлар юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.