Видеодан кадр

Тошкент шаҳрида «Yutong» ва «King Long» русумли автобуслар ҳамда «Onix» иштирокида йўл-транспорт ҳодисаси юз берди. «Тошшаҳартрансхизмат» АЖ ахборот хизмати ҳолат юзасидан маълумот берди.

Қайд этилишича, бугун, 25 сентябрь куни соат 10:10 ларда пойтахтнинг Мирзо Улуғбек тумани М.Улуғбек кўчасида «King Long» русумли автобус ҳайдовчиси А.С. бир йўналишда ўзига нисбатан олдинда ҳаракатланаётган «Yutong» русумли автобусга нисбатан оралиқ масофани сақламагани туфайли йўл-транспорт ҳодисасини содир бўлган.

Ўз навбатида, «Yutong» русумли автобус тўқнашувда олган инерцияси таъсирида ўзига нисбатан олдинда ҳаракатланаётган «Onix» русумли автомобилга бориб урилган.

Дастлабки маълумотларга кўра, ҳодиса сабабли «King Long» русумли автобусда йўловчи сифатида кетаётган 46 ёшли М.И. қўрқиш ва қаттиқ стресс ҳолатига тушиб қолган. Унга тиббиёт масканида тез-тиббий ёрдам ходимлари томонидан биринчи ёрдам кўрсатилган.

Тўқнашув оқибатида ҳар иккала автобус ҳам техник шикастланган. Ҳозирда мазкур ЙТҲ ўрнатилган тартибда шаҳар ЙҲХБ ходимлари томонидан расмийлаштирилган.