Видеодан кадр

Ижтимоий тармоқларда Тошкент шаҳрида икки машина ҳайдовчилари ва уларнинг йўловчилари йўл ўртасида жанжаллашиб кетгани акс этган видео тарқалди. Мазкур ҳолат юзасидан пойтахт Ички ишлар бош бошқармаси муносабат билдирди.

Қайд этилишича, воқеа жорий йилнинг 21 декабрь куни тахминан соат 23:30 да Чилонзор тумани КҲАЙ кўчасида содир этилган. Ўша куни «Cobalt» русумли 2 та автомашина ҳайдовчилари ўртасида йўл талашиш ҳолати содир бўлган.

Хусусан, 2002 йилда туғилган А.А. (йўловчилари: 2001 йилда туғилган Р.У. ва 1988 йилда туғилган С.Ж.) ҳамда 2000 йилда туғилган А.А. (йўловчилари: 1999 йилда туғилган Ш.А., С.Н. ва Б.С.) ўртасида келишмовчилик юзага келган. Шундан сўнг улар йўлнинг қатнов қисмида ўзаро жанжаллашиб, жамиятда юриш-туриш қоидаларини қасддан менсимасдан жамоат тартибини бузган.

Билдирилишича, муштлашув оқибатида тан жароҳати олиб, тиббиёт муассасасига мурожаат қилган фуқаролар аниқланмаган.

Маълум қилинишича, мазкур ҳолат юзасидан Чилонзор тумани ИИО ФМБ томонидан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилган.