Кучли таъсир қилувчи дори воситалари савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Бош прокуратура ҳузуридаги Департаментнинг Юқоричирчиқ тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбир давомида кучли таъсир қилувчи дори воситалари савдоси билан шуғулланиб келган фуқаро Ф.М. фуқаро М.Х.га 100 дона «Галара» номли кучли таъсир қилувчи дори воситасини 4 миллион сўмга сотган вақтида ашёвий далиллар билан қўлга олинган.

Шу каби яна бир ҳолат, департаментнинг Ўртачирчиқ тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда ҳам аниқланган.

Унга кўра, кучли таъсир қилувчи дори воситалари савдоси билан шуғулланиб келган муқаддам судланган фуқаро Х.Х. таркибида кучли таъсир қилувчи моддалари мавжуд бўлган 10 дона «Регапен» номли дори воситасини фуқарога 1 миллион сўмга сотган вақтида ашёвий далиллар билан ушланган.

Ҳозирда мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.