Термиз туманида барпо этилган янги автошоҳбекат тантанали равишда фойдаланишга топширилди. Бу мажмуа нафақат ташқи кўриниши, балки йўловчилар учун яратилган қулайликлар ва хизмат сифати билан ҳам эътиборни тортмоқда.

Автошоҳбекат бир вақтнинг ўзида 950-1000 нафар йўловчига хизмат кўрсата олади. Бу эса Термиз шаҳри ва унинг атрофидаги 7 та туман аҳолиси учун янги имкониятлар эшигини очади. Айниқса, М–41 халқаро автомагистрали йўналишида ҳаракатланувчи йўловчилар учун бу жой янги марказга айланмоқда.

Янги автошоҳбекат транспорт тизимини яхшилаш, шаҳарга кириш-чиқиш жараёнларини енгиллаштириш, янги маршрутлар ташкил этиш, тезкор ва хавфсиз ҳаракатни таъминлашда ҳам муҳим аҳамият касб этади.

— Термиз шаҳар — Жайрахона йўналишида ҳаракатланувчи 303-автобус ҳайдовчисиман, — дейди Шавкат Валиқулов. — Шоҳбекатнинг барпо этилгани биз, ҳайдовчилар учун ҳам катта қулайлик бўлди. Аввалги бекатларда тиқилинч, нотўғри жойлашув, йўловчиларнинг қийналиши оддий ҳолат эди. Бу янги автошоҳбекатда эса ҳамма нарса аниқ, жойлар кенг, навбат тизимга тушган. Йўловчилар ҳам рози. Энг асосийси — хавфсизлик таъминланган.

Янги автошоҳбекатнинг ишга туширилиши вилоятда транспорт инфратузилмасининг ривожланишига хизмат қилар экан, у иқтисодий фаоллик ва ижтимоий қулайликни ҳам ошириши кутилмоқда. Бу каби инвестициявий лойиҳалар Сурхондарё вилояти ривожига катта ҳисса қўшиши шубҳасиз.

Фарҳод ЭСОНОВ

«Халқ сўзи».