Темурийлар тарихи давлат музейида Соҳибқирон Амир Темур ҳақида батафсил маълумот берувчи экспонатлар жумладан, Темурнинг узуги, либослари, қурол-аслаҳалари ва Темурийлар даврига оид нодир илмий манбалар мавжуд.

Музейдаги экспонатлар сиғими юқорилиги ва ранг-баранглиги хорижлик ва маҳаллий меҳмонларни доим ўзига жалб қилиб келган. Ўзбекистондаги Ислом цивилизацияси маркази экспозициясида Амир Темур ва Темурийларга алоҳида жой ажратилган бўлиб, бунда экспозициянинг жозибадор ва халқаро талабларга мос келувчи маскан бўлиши кутилмоқда. Бу ҳақда Марказ ахборот хизмати маълум қилди.

Айни кунларда Марказ томонидан тузилган бир гуруҳ олимлар томонидан “Темур тузуклари”нинг қадимий қўлёзмалари ва нашрларининг нусхалари тайёрланиб, тўпланмоқда. “Темур тузуклари” асосида Амир Темур давлатининг маъмурий-ҳудудий бошқарувига оид материаллар яратилиши режалаштирилган.

Илмий-инновацион лойиҳалар Ўз ФА Шарқшунослик институти, Халқаро Амир Темур жамоат фонди, WOSCU ва Ташқи ишлар вазирлиги ва Россия ФА Шарқшунослик институти, Тожикистон Миллий университети ҳамда қатор халқаро ҳамкорлар билан бирга амалга оширилиши режалаштирилган. Халқаро Амир Темур жамоат фонди раиси, Ўзбекистон халқ ёзувчиси Муҳаммад Али лойиҳа ҳақида ўз фикрларини билдирди:

— Одамларни лол қолдириш, ҳайратга солиш мушкул вазифага айланган замонда яшаяпмиз. Мен ишонч билан айта оламан минглаб олимлар, мутахассислар иш олиб бораётган, мамлакат раҳбарининг шахсий ташаббуси билан бунёд этилаётган Ўзбекистондаги Ислом цивилизацияси маркази ташриф буюрувчиларни ҳайратлантира олади. Экспозицияда Соҳибқирон империясининг рангдор “смарт” харитаси ва “Темур тузуклари”нинг ўнлаб нашрлари жамланади. Амир Темур ва Темурийларга оид кўплаб экспонатлар йиғилиб ва Соҳибқироннинг хориж рассомлари томонидан чизилган, аммо ҳали кенг жамоатчиликка маълум бўлмаган суратлари намойиш этилади, — деди Фонд раиси.