Аҳмадали ШEРНАЗАРОВ/«Халқ сўзи». Ховос туманининг Янгиер маҳалласи ҳудудида жойлашган «Зафаробод» оилавий шифокорлик пункти фойдаланишга топширилди.

— «Ташаббусли бюджет« туфайли эскириб қолган оилавий шифокорлик пункти биноси реконструкция қилиниб, янги ва кўркам ҳолатга келтирилди, — дейди туман тиббиёт бирлашмаси бош шифокори Мақсатулла Нарзуллаев. — Шу билан бирга тиббий жиҳозлар ҳам янгиланди.

Мазкур тиббиёт муассасасида «Дори-Дармон« акциядорлик компаниясининг Сирдарё вилояти минтақавий бўлинмасига қарашли ижтимоий дорихона фаолияти ҳам йўлга қўйилганлиги барчага манзур бўлди.

Айни вақтда ушбу тиббиёт маскани жамоаси «Ташаббусли бюджет«нинг иккинчи мавсумида иштирок этяпти. Лойиҳага кўра ЭКГ, УТТ каби тиббий аппарат, лаборатория асбоб-ускуналари ва бошқа керакли жиҳозлар харид қилинади. Натижада касалликларни эрта босқичларда аниқлаш, даволаш имкониятлари ошиши баробарида аҳолининг ЭКГ, УТТ сингари аппаратлар орқали тиббий текширувларидан ўтиш учун туман маркази ёки шаҳарга бориши, ортиқча вақт ҳамда пул сарфлашига ҳожат қолмайди.