Саминжон ҲУСАНОВ/«Халқ сўзи». Андижон шаҳридаги «Меҳмонхона» электр узатиш тармоғига уланган истеъмолчилар сонининг кескин ортиши электр таъминотидаги узилишларга сабаб бўлаётганди. Янги ячейка ўрнатиш орқали бу муаммога чек қўйилди.

— Натижада Чўлпон 100 йиллиги номли МФЙ ва унга ёндош кўчаларда яшовчи 8 минг нафар аҳолига хизмат кўрсатиш сифати кескин яхшиланди, — дейди “Ҳудудий электр тармоқлари” АЖ Андижон филиали ходими Мухлисахон Собирова. — Бунинг учун 2 км масофага янги тармоқ тортиш ишлари ҳам амалга оширилди.

Куз-қиш мавсумида электр таъминотидаги узилишлар сони кескин ортади. Бунга электр энергиясига бўлган эҳтиёжнинг ортиши, ноқонуний уланишлар ва истеъмолчилар сонининг кўпайиши каби ҳолатлар сабаб бўлади. Айрим ҳолларда фавқулодда вазиятлар туфайли носозлик юзага келиши мумкин. Бундай ҳолатларнинг олдини олиш, таъминот сифатини яхшилаш мақсадида жорий йилнинг ўзида вилоят бўйича 28,4 км узунликдаги тармоқни реконструкция ва модернизация қилиш ҳамда 10 та трансформаторни таъмирлаш ишлари бажарилди.