Иллюстратив фото

"Microsoft" корпорациясининг асосчиларидан бири бўлган Билл Гейтс таниқли телебошловчи Жимми Фэллонга берган интервьюсида сунъий интеллектнинг келажаги ҳақида дадил башоратлар қилди.

У сунъий интеллект бир пайтлар шахсий компьютерлар каби кенг тарқалган ва ҳаммабоп бўлишига ҳамда тиббиёт ва таълим соҳасидаги мутахассислар етишмовчилигини бартараф этишга ёрдам беришига ишонч билдирди.

Гейтснинг сўзларига кўра, ўн йилдан сўнг одамлар сунъий интеллект ёрдамида малакали тиббий тавсиялар ва таълим хизматларини олиши мумкин бўлади. Шунингдек, унинг тахмин қилишича, технологиялар ривожланиши иш ҳафтасининг давомийлигини сезиларли даражада — икки кунга қадар қисқартириш имконини беради, бу иш унумдорлигининг ошиши ҳисобига бўлади.

Бироқ бундай оптимизм бир қатор экспертларда шубҳа уйғотди. Улар соғлиқни сақлаш тизимидаги тизимли муаммолар ва мавжуд сунъий интеллект моделларининг чекланишларини, шу жумладан, алгоритмларнинг фаразларга асосланганини ва маълумот беришда мумкин бўлган хатоларни кўрсатади.

Бундан ташқари, Билл Гейтс сунъий интеллектнинг иқлимга таъсири ва технологияларни ишлаб чиқишда барқарор ёндашувнинг аҳамиятини муҳокама қилди. Унинг таъкидлашича, ҳисоблаш қувватининг ортиши экологик мақсадларга қарши бормаслиги керак.