«S&P Global Ratings» халқаро агентлиги 2025 йил 23 май куни эълон қилган баёнотида Ўзбекистон бўйича кредит рейтингининг прогнозини «барқарор»дан «ижобий»га кўтарди. Бу ҳақда агентлик веб-сайтида хабар берилган. Шунингдек, «S&P Global Ratings» мамлакатимизнинг узоқ ва қисқа муддатли «BB-/B» даражадаги хорижий ва миллий валютадаги суверен кредит рейтингларини тасдиқлади.

Ушбу қарор, биринчидан, иқтисодий ислоҳотларнинг изчил амалга оширилиши, иккинчидан, барқарор ўсиш суръатлари ва кучли ички талаб билан боғлиқ бўлди. Рейтингнинг кўтарилиши, шунингдек, халқаро олтин нархларининг юқори даражада сақланиб қолаётгани ва бу орқали экспорт ҳамда буджет тушумларининг ошаётганини ҳам инобатга олади.

«S&P» экспертларининг фикрича, Ўзбекистонда 2017 йилдан буён олиб борилаётган иқтисодий эркинлаштириш ва бошқарув ислоҳотлари макроиқтисодий барқарорликни кучайтирмоқда. Мамлакат реал ялпи ички маҳсулоти (ЯИМ) 2024 йилда 6,5 фоизга ўсди ва 2025–2028 йилларда бу ўсиш ўртача 5,6 фоиз атрофида бўлиши кутиляпти.

«Кучли инвестицион фаоллик, хориждан пул ўтказмалари, ҳукумат сармоялари ва истеъмол талаби ушбу ижобий динамикани таъминлаб бермоқда. Мамлакатнинг ЯИМда инвестициялар улуши 2024 йилда 33 фоизга етди, бу жаҳон миқёсида энг юқори кўрсаткичлардан бири ҳисобланади», дейилади хабарда.

Агентликка кўра, пул-кредит сиёсати сўнгги йилларда кучайган, айниқса 2017 йилдаги валюта курсининг эркинлаштирилиши муҳим бурилиш бўлган. Шунингдек, мутахассислар мамлакатимиздаги инфляцияни 2025 йилда 10,1 фоиз, 2028 йилгача эса 8,6 фоизгача пасайишини тахмин қилишган.

«S&P Global Ratings» Ўзбекистоннинг рейтингига нисбатан ижобий қарашини мамлакатнинг кучли иқтисодий ўсиши, изчил ислоҳотлар, буджет мувозанатини тиклашга интилиш ва ташқи қарзлар билан боғлиқ эҳтиёткор сиёсат билан асослайди.