Фото: «Халқ сўзи»

Фарғона вилоятининг анклав ҳудудида жойлашган Шоҳимардон қишлоғи йилнинг тўрт фаслида ҳам бетакрор ва хушманзара табиати билан сайёҳларни оҳанрабодек ўзига чорлайди. Шу боис бу ердаги тарихий-меъморий зиёратгоҳлар, экотуристик марказлар ҳамиша ташриф буюрувчилар билан гавжум бўлади.

Айни кунларда эса Шоҳимардонда қиш таровати ҳукмрон. Виқорли қоя-тошлар салтанати, оқ либосга бурканган бепоён арчазорлар, зариф қўшиқлар куйлаб оқадиган тиниқ сойлар, шарқона ҳовлилардаги мароқли суҳбатлар ҳар қандай қишида бир умрга унутилмас хотиралар қолдиради.

— Шоҳимардон табиати музейи, замонавий мезонлар асосида таъмирдан чиқарилган Ҳазрат Али зиёратгоҳи, Ёрдон қишлоғи, Дугоба тоғлари бўйлаб қамраб олинган экотуристик маршрутлар рўйхати йилдан-йилга кенгайиб бораётир, — дейди Шоҳимардон музейи ходими Гулноза Нажмиддинова. — Шоҳимардонга маҳаллий ва хорижий сайёҳларни жалб этиш борасидаги изчил саъй-ҳаракатлар туфайли бу ерга нафақат юртимиз бўйлаб, балки қўшни республикалардан ҳам сайёҳлар оқими тобора кўпайиб бормоқда.

Ботир Мадиёров, «Халқ сўзи».