Фарҳод ЭСОНОВ/«Халқ сўзи». Сурхондарё вилоятидаги Сариосиё маҳаллий аэропортида реконструкция ишлари муваффақиятли якунланди. Ушбу аэропорт «Silk Avia» авиакомпаниясига тегишли АТР-72-600 самолётининг биринчи техник парвозини муваффақиятли қабул қилди.

Реконструкция доирасида аэродромнинг сунъий қопламаси тўлиқ капитал таъмирланди. 1550 метр узунликдаги ва 35 метр кенгликдаги учиш-қўниш йўлаги икки қатламли асфальт-бетон билан мустаҳкамланди. Юриш йўлаги ва иккита АТР-72 русумли самолёт учун мўлжалланган перрон ҳам замонавий талабларга мос равишда янгиланди.

Сариосиё аэропортининг учиш-қўниш йўлаги 1976 йилдан буён фаолият юритиб келади. Уни капитал таъмирлаш ва парвозлар хавфсизлигини таъминлаш орқали АТР-72 ва ундан кичик тоифадаги ҳаво кемаларини қабул қилиш имконияти ҳам кенгайтирилди.

Илк қабул қилинган техник рейс муваффақиятли амалга оширилиб, аэродромнинг тўлиқ парвозга тайёрлигини кўрсатди. 100 нафаргача йўловчига мўлжалланган янги терминал биноси қурилиши ҳам якунланиш арафасида.

Реконструкция ишлари тўлиқ тугагач, бир ой ичида Сариосиё аэропортидан мунтазам йўловчи рейсларини амалга ошириш режалаштирилмоқда.