Самарқанд вилоятида кучли таъсир қилувчи дори воситалари савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Департаментнинг Самарқанд вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида Самарқанд шаҳрида тезкор тадбир ўтказилган.

Аниқланишича, қонунга хилоф равишда дори воситалари савдоси билан шуғулланиб келган фуқаролар Ж.З. ва Ж.Х. хорижда ишлаб чиқарилган инсон руҳиятига кучли таъсир қилувчи 48 қути «NEBIDO» ҳамда «XTANDI» номли дори воситаларини фуқарога 98 млн сўм ва 5 500 АҚШ долларига сотган вақтида ушланиб, ушбу дори воситалари ашёвий далил сифатида расмийлаштириб олинган.

Ҳозирда мазкур ҳолат юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят иши қўзғатилиб, тергов ҳаракатлари ўтказилмоқда.