Самарқанд вилоят ҳокимлиги томонидан Ўзбекистон Ёзувчилар уюшмаси аъзоси бўлган бир гуруҳ шоир ва ёзувчилар рағбатлантирилди.

Шу муносабат билан вилоят Матбуот уйида ўтказилган тадбирда сўзга чиққанлар жамият ҳаётида фаол иштирок этаётган, ёшларни ватанпарварлик руҳида тарбиялашга хизмат қилувчи бадиий асарлари билан нафақат Самарқанд балки республика адабий муҳитида муносиб ўрнига эга бўлиб келаётган ижодкорларнинг сафи йилдан-йилга ортиб бораётганлигини таъкидлашди.

Дарҳақиқат, ўтаётган йилда уюшма аъзолари Президентимиз томонидан илгари сурилган 5 та муҳим ташаббуснинг тўртинчиси, аҳоли ва ёшлар маънавиятини юксалтириш, улар ўртасида китобхонликни кенг тарғиб қилиш бўйича узлуксиз равишда тарғибот тадбирларини олиб боришди.

Хусусан, “Самарқанд вилоятида аҳоли ва ёшларни ҳарбий ватанпарварлик руҳида тарбиялаш, фуқаролик позициясини кучайтириш тизимини жорий этиш бўйича комплекс чора-тадбирлар Дастури”нинг ижроси юзасидан юртимизнинг ижтимоий-иқтисодий ривожига ўз ҳиссасини қўшган 8 нафар киши — Ўзбекистон қаҳрамонлари, академик-олимлар, таниқли шоира ва ҳарбий хизматчилар ҳақида кичик-кичик рисолалар яратилди.

Янги нашр этилган адабий асарларнинг мазмун-моҳиятини кенг тарғиб қилиш, китобхонларга қулайлик яратиш мақсадида Ф. Тошев, Ж.Сувонова ҳикоялари, Х.Бобомуродова шеърлар асосида кўзи ожиз мухлислар учун аудио китоблар тайёрланди.

Шунингдек, жорий йилда вилоят ижодкорларининг 17 та китоби нашр этилди. Шундан 8 таси уюшма аъзолари Исмат Санаев, Эркатош Шукурова, Нусрат Раҳмат, Фармон Тошевнинг насрий ва назмий, Худойберди Комилов, Жумагул Сувоноваларнинг шеърий, Тошпўлат Тугаловнинг бадиий-публицистик китобларидир.

Октябрь ойида Ўзбекистон Ёзувчилар уюшмасининг “Ижод” фонди томонидан чоп этилган 1000 дона китоб олиб келиниб, адабий-бадиий тадбирлар, турли танловлар ғолибларига топширилди.

Шу билан бирга, вилоят ҳокимлиги томонидан ёшлар ижодини рағбатлантириш, уларни маънавий қўллаб-қувватлашга ҳам жиддий эътибор қаратилмоқда. Яқинда Тошкендаги “SAHHOF” нашриётида 50 нафар ёш иқтидорли қаламкашларнинг “Самарқанд мушоираси” номли баёзи чоп этилди.

Мазкур тадбир давомида пандемия шароитида ҳам қизғин ижод қилиб келаётган Ўзбекистон Ёзувчилар уюшмасининг 20 нафар аъзосига вилоят ҳокимлигининг қимматбаҳо эсдалик совғалари ҳамда Ўзбекистон Ёзувчилар уюшмаси вилоят бўлими томонидан китоблар топширилди.

— Бундай эътибор биз ижод аҳлини қўлимизга қалам олиб, янада илҳомланиб янги-янги асарлар яратишга ундайди, - дейди Ўзбекистонда хизмат кўрсатган маданият ходими, шоира Ҳосият Бобомуродова. — Айниқса, вилоят ҳокимининг бу ташаббуси, кўрсатаётган ғамхўрлиги тақсинга лойиқ. Самарқанд ижодий муҳитидаги ёш ижодкорларимизнинг сафи кенгаяверсин. Биз уларга устозлик қилиб чарчамаймиз.

Тадбир доирасида шунингдек, “Зарафшон” газетаси кутубхонасидан” туркумида чоп этилган “Зарафшон” зарварақлари” китобининг ҳам тақдимоти бўлиб ўтди.

Унда газетанинг узоқ йиллик фаолияти давомида чоп этилган энг қайноқ, кишини ҳам ўйлантирадиган, ҳам ўртантирадиган, баъзан аччиқ, баъзан ширин кулдирадиган лавҳалар сараланиб, китоб ҳолига келтирилгани айтиб ўтилди.

Абдулазиз Йўлдошев
(Халқ сўзи)