Россия кучларининг Қора денгиздаги порт шаҳарга зарбалари тинмаяпти.

Одесса вилояти губернатори Олег Кипернинг маълум қилишича, Россия томонидан почта омборига уюштирилган баллистик ракета зарбаси оқибатида катта ёнғин чиқиб, 14 киши жароҳатланган. Бу Қора денгизда жойлашган порт шаҳарга охирги кунлардаги учинчи ҳужум бўлди.

Россия ракеталари томонидан Шарқий Донескдаги Марйинка фронтидан 12 километр узоқликда жойлашган Хирник шаҳрига берилган зарбалар оқибатида камида икки киши вафот этиб, олти нафар инсон яраланди. Шунингдек, хавф остида қолаётган, душман чегарасидан 13 километр узоқликдаги Харков вилоятидаги Золочив шаҳрига бомба отилган. Ушбу ҳужум икки кишининг ҳалок бўлиши ва 13 нафар инсоннинг яраланишига олиб келди.

Украинанинг шарқий стратегик таянчи ҳисобланмиш Часов Ярни ҳимоя қилаётган қўшинларда ўқ-дорилар, жумладан, артиллерия снарядлари етишмаслиги кузатилмоқда. Бунга сабаб Россия томонидан доимий зарбаларнинг тинмаётганидир.

«Associated Press» ахборот агентлиги томонидан олинган янги дрон тасвирлари рус қўшинларининг тинимсиз артиллерия зарбалари Часов Ярни қандай вайрон қилганини кўрсатади. Олдин шаҳарчада 12 минг киши истиқомат қилган. Аммо ҳозир ҳудуд одамларсиз ҳувуллаб қолган.

Украинанинг учувчисиз самолёт ҳужумлари марказий Орел ва жанубий Курск вилоятларидаги қишлоқларда электр энергиясининг узилишига сабаб бўлди. Шунингдек, Украина қуроллари Москвадан 190 км жануби-шарқда жойлашган Рязандаги Россия нефтни қайта ишлаш заводига урилган.

Янги санкциялар

АҚШ Россиянинг Украинадаги уруши сабабли 300 га яқин компанияга нисбатан янги санкцияларни эълон қилди. Москва бу чекловларни Хитой орқали четлаб ўтиши сабабли санкциялар Хитой ва Гонконгда жойлашган 20 та компанияга, жумладан, дронларни ишлаб чиқаришда фойдаланиладиган буюмларни экспорт қилган бир қанча ташкилотга нисбатан қаратилган.

Ўз навбатида, Россия мудофаа вазири Сергей Шойгу Украинадаги уруш учун қурол ишлаб чиқаришни кўпайтириш ва етказиб беришни тезлатиш ҳақида топшириқ берди. Вазир Москва Украинада Россия қўшинлари томонидан қўлга олинган Ғарб танклари ва ҳарбий техникаларини намойиш қилиб, Киев иттифоқчилари Россия ҳужумларида тўсқинлик қила олмаслигини маълум қилди.